Ka Federation of Khasi Jaintia & Garo People (FKJGP) Thadlaskein Block Circle ka la ioh ban pyniar shuh shuh ia ka tnat treikam jong ka sa ha ka shnong Nangbah mynta ka sngi ia kaba la tip kum ka FKJGP Nangbah Unit.
Ia ka jingialang la pyniaid da u ma Wompher Wann uba dei u Organising Secretary ka FKJGP West Jaintia Hills District. Ha kane ka sngi u ma M.C. Suting President jong ka FKJGP East Jaintia Hills ula ai ki jingsneng jingkyntu ia ki paidbah ban don ia ka mynsiem iatreilang bad ki sengbhalang kiba ieng na ka bynta ban shakri hok ia ka ri bad ka jaidbynriew.
U ma D.S. War, Chief Organising Secretary ula ong ba ka FKJGP ka dei ka seng jong ki rangbah, namar ba bun kiba wan ban pyniasoh sha ka seng ki dei kila la san la rangbah bad bun ruh na ki kidei ki nongialam shnong ialam thaw bad ki nongialam niam.
La ioh ruh ka jingkren na u President ka FKJGP Jaintia Hills Zone u ma Tuesday Lytep uba la kyntu ia baroh ki dkhot ban long kiba iadei jingmut kum shi ïing shisem khnang ba kan long ka nongrim ban shakri ia ki paidbah.
Khadduh la ioh ka jingkren sneng bad kyntu na u ma Kitboklang Nongphlang Vice President FKJGP Central Body. Ha ka jingkren jong u, ula ong ba ki paidbah kim dei ban shu kynnoh ia baroh ki sengbhalang hynrei ki dei ban sngewthuh ban don ka jingiatreilang bad ki sengbhalang khnang ba yn lah ban ai ka jingshakri kaba hok sha ki paidbah.
Ha kane kasngi la pyllait paidbah ruh ia ki sur jingrwai jong ka seng bala shna da ka FKJGP Nangbah Unit. Ia ki dkhot jong kane ka Unit la pynbam smai da Vice President ka Central Body u bah Kitboklang Nongphlang.
