Ka Sarot I Man (SIM) kawei na ki kynhun treimon sngewbha na Jowai, mynta ka sngi (27.11.2022) kala leit ban ai jingiarap sha ki nongshong shnong jong ka shnong Muthlongrim kiba donkam eh ia ka jingiara da ki jaiñ sopti phong Tlang.
Ha kane ka sngi la pdiang burom ia ki dkhot jong ka Sarot I Man da u Waheh Shnong ka Muthlongrim u ma Emhi Kanai, bad la pynlong ia ka jingialang kaba lyngkot kaba la aiti ban pyniaid da u ma Aziz War u dkhot jong ka seng.
Haba sdang jong ka jingialang la ioh ia ka jingnguhblei da u ma Ram Sumer. La ioh ia ka jingkren pynithuh shaphang ka seng bad ki jingtreikam jong ka da u ma Riquoma Rq. Laloo. U ma Riquoma ula ong kane ka jingwan ai jingiarap jong ka seng (SIM) sha kane ka shnong kam don jingiadei ei ei bad ki kam elekshon ula pynshai namar ioh don kiba sngewthuh bakla namar bala jan ka por elekshon, hynrei u ong ba ka seng kam don kano kano ka jingiadei bad kino kino ki kam elekshon bad kane ka dei tang ka kam lehisynei jong ka seng sha kito kiba donkam shisha ban ioh ka jingiarap. Ula kyntu ruh ia ki longkmie ba kim ju dei ban pynduh jingkyrmen ia ki khun ki kti jong ki khamtam ha ka pule puthi. U ma Laloo ula pynkynmaw bad khot lang ia baroh ki paidbah ban iasnohkti lang bad ka seng ha jingpynlong ia ka Awareness cum Blood Donation Camp ka ban sa pynlong ha Jowai Blood Bank ha ka 12.12.2022.
Kiwei de kiba la kren ha kane ka jingialang ki long ka kong Joyful Kanai kaba dei ka Secretary jong ka shnong Muthlongrim, kaba la pynpaw ka jingsngewnguh ia kane ka kynhun ki 11 ngut shiparalok kiba don ia ka mynsiem kaba jynsur ban iarap ia ki para briew. Ka ai ruh ka jingkyrkhu kyrdoh ia ki baroh ba kin nanglah ban pyniaid shaphrang ia ki kam ki jam jong ki.
Na ka liang jong u Waheh Shong ma Emhi haba kren ha kane ka jingialang ula ong ba kum u nongialam shnong u kloi ban pdiang da ka mynsiem jingieit ia kino kino ki sengbhalang, lane ki kynhun jong ki riew shimet kiba kloi ban wan ai jingiarap ia ki khun ka shnong ka thaw jong u.
Ia ki kyntien ai khublei la ai da u ma Shape Pasweth.
Hadien bala wai ka jingialang la sam ia ki sopti sha baroh ki nongshong shnong kiba wan sha kane ka jingialang, katba ia kiba tam pat la aiti ha ka Secretary Shnong ban sam pyndep sha kito kiba donkam shisha ia ki.
