Ha ka 5 tarik March 2022 ka kynhun Trekking and Adventure Group Dkhiah West hapoh ka jingpynbeit jong u Dr. R.Phawa ki la iaid kjat da ki spah ngut naduh ki rangbah, ki samla, ki khynnah, kynthei bad shynrang. Ki rangbah kum jong u ma Jiren Swer, u ma Muni Swer wat ha ki rta ba la heh ruh ki dang lah ban iaid bad ialam lynti ia ka kynhun. Hashwa ban sdang la ioh ban kren lyngkot bad ka jingsneng kyntu na u waheh shnong ma Comingone Tlang bad la pynkut da i jingduwai na u Tbn. Livingstone Phawa.
Ka kynhun ka la pynpaw ba katei ka sngi kan long kaban sah jingkynmaw ia baroh, namar ba ki ioh ka lad ban buddien ia ki lynti barim bajah ha kaba ki longshwa manshwa ki iaid ki ieng, leit iew leit hat bad leit skul. Ki rangbah ki shait iathuhkhana ba ha ki por barim ki briew na Dkhiah, Rymbai, Khliehriat, Sutnga, Saipung ter ter ki shait leit skul shaduh Shangpung bad ki hap ban iaid da kjat lyngba ki lum ki wah ki raieh raidam hynrei ka mynsiem wad jingstad ka rhem ha ki wat la ki hap ban iaid da ki bun kynta.
Ka kynhun ka la iaid lyngba ka Kaitungtoh, Jalyiah, Khlieh Yurim Sohkymphor, Sohkymphor Nein, Wah Umpaai bad Khliehrangnah ban poi shaduh Shangpung. Ki la ioh ban sakhi ia ar tylli ki skul, ka Shangpung Presbetarian Lower Primary School, Shangpung Mission bad ka Shangpung Govt UP school, Moolibang. La pdiang sngewbha ia ki da u headmaster shri Nangtur Langstang ryngkat ki nonghikai Mrs Rita Margareth Wann bad Mrs Laiaieit Suiam ka skul Shangpung Presbetarian Lower Primary School (1865) Shangpung Mission, ka ba la seng da U Woh Don Sutnga ( u Kristan ba nyngkong duh na Shangpung ) kaba la kiew kyrdan sha ka ME School, secondary school haduh higher secondary school. Dei ha kane ka skul ba u nongthoh kot bad poitri ba pawnaw ka jaidbynriew jong ngi U Myllung Soso Tham u wan hikai ha u snem 1922. La iathuh khana lyngkot shaphang ka skul da i Mrs Rita Margareth Wann. La kren shaphang ka jingiaid bad jingim u myllung Soso Tham da i Miss Percia Phawa. La pynkut da ka jingduwai na u shri Muni Swer bad la ioh ban ia dih sha sngewbha ba la pynkhreh da ka skul .
Shuh shuh ka kynhun ka la kitbok kitrwiang ia ka skul, ki nonghikai bad ia ki khynnah skul ruh kumjuh ba kin nang sei shibun ki mawlynnai bad ka la pynpaw ruh ia ka jingkmen ka mynsiem jong ki ba ki ioh sakhi ia ki lynti ba rim ba ki kpa tymmen jong ngi ki iaid kumjuh ruh ban tip bad sakhi ia ki dienjat u Myllung Soso Tham ha ka skul ha Shangpung kaba pynmih ia shibun ki khlur ka jaidbynriew.
Kumban shu pynkynmaw kane ka kynhun ka la pylong ia kum kine ki jingiaid kjat la lai sien. Ka sien ba nyngkong ki la iaid kjat na Dkhiah West sha Jowai ha ka 25/2/2017, Ka sien ba ar na Dkhiah West sha Borkhat ha ka 13/2021 bad mynta ka kynti (5/3/22) na Dkhiah West sha Shangpung.
