Da ki spah tylli ki ïing briew kiba shong ba sah ha Dkhiah East, Lad-Sutnga kila hap ban sah hapoh ka jingdum man la ka miet mynta kumba la ar taiew tam ei ei tang namar ka jingsniew jong uwei u transformer 250 kv u ba don hapoh kane ka shnong bad ki paidbah ki hap ban mad ia ki jingeh kiba bun jaid bun rukom kiba ym lah shuh tang ban mutdur namar ban im ha kine ki sngi ha ka jingdum khlem ka light (jingshai) ka long kaei kaei kaba ym lah shuh tang ban batai namar la jan baroh ki kam la don kam beit ka bording ha baroh ki liang.
Ka Jaintia National Council-Khliehriat Circle hapoh ka jingialam u Diamond Bareh Working President JNC -KC da ka mynsiem ka jingsngewkhia hadien ka jingud ki paidbah sha ka seng, ka la leit ban buh ia ka dorkhas jong ka mynta ka sngi ka 09.04.25 sha ka office trei kam jong u Executive Engineer MePDCL, Khliehriat Division u Bah Pohshna ban pynsngew ia kane ka jingiakynduh mawsiang ki paidbah hapoh ka shnong Lad-Sutnga namar ka jingbym ioh light (jingshai) mynta kumba la ar taiew tam ei ei bad la dawa ruh na ka ophis jong u EE ban pynioh bor ding noh wut wut khlem da pynslem shuh khnang ban myntoi ki paidbah.
Ha kane ka jingiakynduh ia u EE u la ong ba ka ophis ka la ioh ka jingtip ia kane ka jingbym ioh light ka shnong Lad Sutnga hynrei namar ka jingbymdon transformer hapoh ka division yn hap ban wad lad wad lynti shwa ban pynioh kloi katba lah ia u transformer, u la ong ruh ha ka jingshisha kane ka dei tang ka kam ba rit ym dei kaba shitom haduh katta, hynrei don kam tang ban ioh ia u transformer, yn da la lah ban ioh transformer na ka liang jong ka ophis kan trei wut wut khnang ban pynioh light sha ki paidbah ka shnong Lad Sutnga.
Ka seng ka la phah ruh ia ka copy sha u Superintendent of Engineer ka MePDCL Jowai da kaba leit ia kynduh bad u hapoh ka ophis trei kam jong u SE kaba don ha Jowai bad na ka liang jong u SE u la ong ba um pat ioh jingtip ia kane ka kam, hynrei mar shu tip na ka liang jong u SE u la leh ia kaba don kam na ka bynta ban pynioh transformer ia ka shnong Dkhiah East (Lad Sutnga), u la ong ruh ba na ka liang ka ophis jong u SE kan pynkloi katba lah ban pynioh transformer sha ki paidbah ka shnong Lad Sutnga, haba kylli shaphang ka bill light jong ka shnong Lad Sutnga u la ong ba kat kum ka jingtip jong u, ka long ka iaid beit lait tang katto katne tylli ki ïing ki ba dang sah bad yn sa ot ruh ia ka connection jong kito ki ïing bym siew bai bording.
Na ka liang jong ka seng ruh ka la kyntu bad dawa jur ruh na ka ophis trei kam jong u Executive Engineer, Khliehriat Division bad kumjuh ruh na ka ophis trei kam jong u SE MePDCL Jowai ban pynkloi noh wut wut khlem da pynslem shuh ban pynioh bor ding noh kloi ia ki nongshong shnong ka Dkhiah East Lad Sutnga khnang ban pynsuk ia ki paidbah kumjuh ruh ia ki khynnah pule bad ia kiba trei jingtrei ha kiba bun ki liang namar ban sah haka jingdum khlem ka bor ding kam long ka ba suk ha kine ki sngi la pynkut u Diamond Bareh Working President JNC-KC.