Ka Khasi Students’ Union (KSU) West Jaintia Hills District mynta ka sngi kala hiar sha kawei na ki skul ka St. Thomas Lower Primary School kaba don haka shnong Mooluber da kaba synñiang da ki tin sop ïing sa katei ka skul.
Ha kane ka sngi la ïadon lang u Chanbor War Vice President, samla Phrang Law Vice President Ka Laskeiñ Circle bad kiwei de ki Dkhot jong ka seng, ha ryngkat ka jingdon lang ka trai jong kane ka skul ka kong Minphik Laban bad kiba ha ïing ha sem.
La ïathuh ba kane ka skul ka la ai ka jingshakri ha ka jingnang jingstad la 10 snem tam hapoh kane ka thaiñ kaba don markhap bad ka Assam, kane ka Skul kadon 6 ngut ki Nonghikai bad 85 ngut ki khynnah skul kiba pule naduh ka KG haduh klas VI.
Naka liang Seng ka ai ka jingkitbok kitrwiang ïa ka kong Minphik Laban kaba la kloi bad mih shakhmat ban seng ïa kane skul kaba ai ka jingkyrkhu ïa ki hep kiba rit kiba lah ban wan ïoh ka jinghikai kaba biang ha kane ka Skul.
Ka trai jong kane ka skul ha ka jingkren kala pynsngew ïa ki jingeh ban pynïaid ïa kane ka Skul namar ka bai skul ka long kaba tad bad jing pynlut kiba bun ha ka ban siew tulop ïa ki Nonghikai. Hynrei da ka jingwan ban ai mynsiem ka seng kan dei ka jing kyrkhu ïa kane ka skul bad ka thaiñ hi baroh kawei bad kumjuh ruh kala kitbok kitrwiang ïa ka seng ba kan dang lah ban Shakri kham bha ïaka Ri bad ka Jaitbynriew hi baroh kawei.