Ka Rotary Club Jowai kawei na ki kynhun treimon sngewbha kaba la synñiang shibun ki kam babha hapoh ka imlang ka sahlang, mynta ka sngi 12 tarik u Jylliew kum ka dak ban leh burom ïa ka ‘World Environment Days’ kala synñiang da ki tynrai dieng sha ka skul Jawahar Navodaya Vidyalaya (JNV) kaba don ha shnong Mukhla, West Jaiñtia Hills District.
Ha kane ka sngi hashwa ban pynlong ka jingthung ïa ki 120 tylli ki tynrai dieng ba la pynïoh da ka Rotary Club Jowai, la don ka jingïalang ha phyllaw jong katei ka skul, ïa ka prokram la pynïaid da u Rtn. D. Toi, President RD Jowai bad la ïoh ruh ka jingrwai na ki khynnah jong kane ka skul.
U bah Silvester Dkhar Phanbuh, MCS, Extra Assistant Commissioner, WJHD kum u kongsan ha kane ka sngi, ha ka jingkren ula ai ka jingïaroh ïa ka Rotary Club Jowai kaba la shim ïa kane ka jingkitkhlieh ban pynbha ïa ka jingitynnad jong ka mei mariang, ula buh ka jingkyntu ba ka jingrakhe ïa ka World Environment Day kam dei tang shisngi hynrei dei ban kynmaw ïa ka manla ka por.
Ula ong ban long kum ki Member jong ka Rotary Club Jowai kam long kaba suk namar ki dei ki briew kiba don ka mynsiem trei shitom ha ka imlang sahlang bad kila long lypa ki briew kiba jop ha kino kino ki kam ba ki don, kumta u pynpaw ka jingsngewnguh halor ka jingïoh lad jong u ban ai jingkren ha kum kane ka sngi.
Kum ki khynnah skul kiba long ki lawei ki dei ban long ka nuksa ban pynbha ïaka mei mariang ha kine ki 20 snem ban wan, la ong u bah Phanbuh. Ula pynkynmaw ha ka jylla Meghalaya ka jingdon ki khlaw ka kot kumba 76%, hynrei mynta la sdang ban syllen ki lum ki wah namar ka jingbun briew katba nang mih ki sngi.
Na ka liang u Rtn S.K Lato ula aiti ïa u tynrai dieng ha u Principal jong ka skul u Neeraj Kumar bad u Rtn. J.M Pohsngap ula aiti ha u Extra Assistant Commissioner.
La ïoh ruh ka jingkren da ki dkhot ka RCJ kiba kynthup na u Rtn. R.E Laloo, Rtn. M. Passah, na u Principal jong ka skul, katba ïa ki kyntien ai khublei la ïoh na u Rtn. B.P Najiar, Director Community Service.
Hadien kane ki dkhot jong ka Rotary Club Jowai, ki nonghikai bad ki khynnah skul kila shim bynta lang ban thung ïa kitei ki tynrai dieng ha phyllaw (Campus) jong ka skul, da kaba kyntu ïa ki bor pynïaid skul ban sumar bha ïa ki khnang ban kin ïoh ban heh ban san.
