Ka jingialang kaba la khot mynta ka sngi da ka ophis jong ka District Social Welfare Officer, West Jaintia Hills District na ka bynta ki lai tylli ki Rehabilitation Workers jong Block Amlarem, Thadlaskeiñ bad Laskeiñ C&RD Block kila ioh ban iakren ia shibun ki kam ha ka jingiadei bad ka jingthep vote jong ki briew kiba don jingduna ha kane ka elekshon MLA ka ban sa long shen.
Kum ka jingiarap ban pynsuk ia kine ki briew ba don jingduna ka tnad Social Welfare kan sa buh da ki Wheelchair ha ki jaka thep vote (Polling Station) khnang ban pynsuk ia kine ki briew ban ioh pyndep ia ka hok thep vote jong ki. Katkum ka jingkheiñ bala ai da kane ka tnad lyngba ka District Social Welfare Officer kong J.Synnah la ong ba ki don 1617 ngut ki briew kiba don jingduna kiba la ioh ia ka hok ban thep vote hapoh ka West Jaintia Hills District.
Ha kane ka jingialang la wan ban ai ka jingpynsngewthuh da u bah D.R.J Syiem uba dei u Nodal Officer ka Unique Disability ID Project, State Resources Centre on disability Affairs, Civil Hospital, Shillong bad la iadon lang ki nongmihkhmat na ka tnad Election Jowai ban iapylliew jingmut halor kane ka kam kaba iadei bad ki briew kiba don jingduna hapoh ka District ki ban sa iashim bynta ha ka jingthep vote.
Ban pynsuk shuh shuh ia ka jingiarap ia ki briew kiba don jingduna, ka sorkar kala buh ia ka App kaba la ai kyrteng ka PwD Mobile App ba kin ioh ban pyndap iabaroh ki jingdonkam jong ki kaba iadei bad ka jingthep vote. Ia kane ka App lah ban ioh na ka website jong ka ECI.
