Ka jingbun palat jong ki ksew ba iaid lyngkar ha nongbah Jowai ha kine ki por kala wanrah jingsyier shibun ia ki nongleit nongwan ha ki lynti syngkieng.
Dangshen ha kine ki khyndiat sngi la ioh khubor ba ki don katto katne ngut ki briew kiba la shah dait ha kitei ki ksew lyngkar kiba iaid sharum shaneng da ki kynhun kynhun.
Haba u Yutipnews u ioh ban iakren bad kawei na ki longïing kaba u khun jong ki ula shah dait ha kitei ki ksew la ar sien ban ban, kila pynpaw ia ka jingsngewsih bad ka jingeh kaba khraw.
U kpa jong ka ïing u bah K. Dkhar, ula ong “Ka long ka jingeh kaba khraw ia ngi kiba duk ba kyrduh haba ngi ia kynduh kum kane ka jingjia. U khun jong ngi ula shahdait ha ki ksew lyngkar la ar sien, ha kine ki khyndiat por. Kumta ngi la phah leit injek ia u sha Hospital bad ka dor jong ka dawai injek ka long kaba rem kaba shongdor Rs.700/- shi injek, nalor ba hap ban ai injek bun sien. Kumba long mynta u khun jong ngi ula dep ban ai injek 6 sien, hynrei ki Doctor ki dang phah wan shuh ha kine ki khyndiat sngi ban wan, kumta ka la ktah bha ia ngi kiba trei bylla sngi”. U la buh ruh ka jingkyrpad ba lada don kano kano ka lad jingiarap na ka liang ka sorkar ba kan pynioh ha ka ban siew lem ia kane ka bai injek, u la ong shuh shuh.
La ioh khubor shuh shuh ba ki dang don ruh sa kiwei pat kiba shah dait ha kine ki ksew lyngkar ba kynthup ia ki khynnah skul. La iathuh ba kine ki ksew ki shait don bha ha ki bynta pdeng jong ka Iawmusiang, ki bynta ban leit sha Mission Compound, ki bynta jong ka Stand War bad sha kiwei de ki dong ki shnat.
Kumta ki bor sorkar ba dei peit khamtam ka Jowai Municipal Board (JMB) ka la dei ban leh ei ei ia kitei ki ksew kiba iaid lyngkar sha ki surok shnong, namar kane kala pynsyier bad buh jingma palat ia ki nongleit nongwan.
