Mynta ka sngi 21.09.2023, ka Jaiñtia National Council (JNC) hapoh ka jingialam u General Secretary kala hiar sha Byndihati bad Umtyr-a ban leit jurip ia ki ar tylli ki project ba sahteng kata ka Residential School bad ka Teacher’s Training centre kaba la neh da ki bun bun snem. Ia ka Residential school la sanctioned ha u October 2015 bad la lah ruh ban pyndep ia ka building kumba la mang ha ki 24 bnai, kumjuh ruh iaka Teachers training centre ha u 2016 lah sanctioned bad lah pyndep ruh ia ki building jong ka, hynrei kaei kaba sngewsih kalong ba haduh mynta ym lah ban pyntreikam ia kine ki project bad la shu ieh khunswet ia ki. Ka seng ka suba jur ruh ba ioh ka don kaei re kaei sha lyndet.
Ha ka jingjurip ka seng ka lap ba la pait lut ki ït ki jingkhang, la i ruh ba la shah rong bad shah tuh lut ki tiar ki tar bad la kyndang lut ia ki kril jingkhang ït bad la paw ruh ba dap sa tang ki klong bilor hapoh ka building. Ka jingshah ieh jong kine ki building ka long kumba ai lad ia ki nongleh kam sniew ba kin ioh rieh tngen ha kine ki jaka bad kane kan wanrah ka jingma bakhraw khamtam ia ki nongleit trei bylla bad ki nongrep ba iaid lynti na ki ne ki jaka.
Kumban shu pynkynmaw ba ha kine ki taiew balah dep ka 6 september, ka seng kala iakynduh mar khmat bad u Dy CM bah Sniawbhalang Dhar ban dawa pyntreikam noh ia kine ki project bad u kular ruh hapoh shi taiew un sa khot meeting hynrei haduh mynta ka sngi ym pat iohi satia iakano kano ka dak.
Kumta ka seng lyngba kine ki dur khih (video) bala ring ka phah sha ka sorkar ba kan peit hi da la ki jong ki khmat ban iohi ia ka jingshisha. Halor kane ka seng ka pynkynmaw biang bad ka kyntu jur ruh iaka sorkar ba kadei ban leh ei ei halor kane shuwa ba kine ki building kin pait lut bad kan ym wanrah ruh iaka jingduhnong, namar lada pyntreikam noh ia kine ki project kan pynmyntoi shibun naduh ki khynnah pule, ki samla wad kam, bad kan ai ruh ka roi ka par ym tang ia ka thaiñ hynrei ia ka Jylla hi baroh kawei.
