Dang ha ka sngi Balang ba u Myntri Rangbah ka jylla, u Conrad K.Sangma u la pyntikna ba ym ju don ka aiñ ba ki Nongtrei bar jylla kin hap ban don ia ki syrnod nongtrei (labour licence) ha ka jylla hynrei mynta ka sngi ka 13 tarik u Naitung ka Khasi Students Union (KSU) Mawthardraishan Circle ka la leit ban khynra ia ki nongtrei bar jylla kiba trei ha Petrol pump Nongshillong bad Mawphanlur.
Ha kane ka jingleit khynra ka seng ka la lap ki bar jylla ki don 5 ngut kiba wan trei haka Petrol pump Nongshillong, Eastern West Khasi Hill bad 7 ngut ha Mawphanlur, West Khasi Hill ki bym don ia ki kot ki sla kiba biang. Ia kitei ki briew ki bym biang kot biang sla ka seng ka la phah leit phai noh mar mar.
U President ka seng, u samla Jibarpaul Thabah haba ai jingkren ha kane ka sngi u la ong ba ka seng kan iai buddien ban bteng ia ka jingkhynra ia ki bar jylla kiba shu wan trei khlem da pynbiang ia ki kot ki sla hapoh ka dong ka thaiñ bad u la maham jur iaki contraktor kiba ju wanrah nongtrei bar jylla, u la ban jur ruh shwa ba kin wanrah nongtrei barjylla ki dei ban pynbiang shwa iaki kot ki sla ba pura lym kumta ka seng lada ka lap biang nangne sha khmat kan leh da kaba tyngeh.