U Myntri Rangbah ka jylla u Conrad K Sangma mynta ka sngi ula ong ba ka dang donkam shuh shuh ban pyniar ia ki ar tylli ki jait ktien kata ia ka Garo bad Khasi khnang ba yn lah ban pynrung ia ki hapoh ka 8th Schedule ka ri India, ia kane ula kren ha ka jingialang ba ula khot ia ki nongialam jong ka Khasi Authors’ Society bad ka A’chik Literature Society ha nongbah Shillong.
Na ka liang jong u Myntri Rangbah ula iathuh ba ka jingthmu jong u haba khot ia kane ka jingialang ka long ban iakren bad iaphylliew jingmut halor ban thaw ki lad ki lynti ban iakren bad ka sorkar India na ka bynta ban pynrung ia ki ar tylli ki ktien kata ia ka Khasi bad Garo hapoh ka 8th Schedule jong ka riti synshar ka ri India.
U Conrad ula iathuh ban jur ba ka long kaba donkam haduh katta katta ban pyniar ia kine ki ar tylli ki jait ktien hapoh ka jylla ym tang ha ki jaka pule, ki seminar ne jingialang hynrei donkam ruh lyngba ki phlim, ki jingrwai bad kiwei de ki lad khnang ba ka ktien kan nang iar shuh shuh.
Ha kane ka jingialang la iadon lang ruh ka Chief Secretary kong R.V. Suchiang, u Commissioner & Secretary, Arts & Culture and Secretary, Home (Political), bah C V Diengdoh.
