U Executive Engineer (PHE), GSWS Division No-II, Mawphlang ula pyntip paidbah mynta ka sngi ba ka jingduh um kor (Water Supply) ha ki katto katne tylli ki bynta hapoh ka sor Shillong kan dang iai bteng na ka daw jong ka jingbthei jong u pipeline uba pynpoi um sha sor Shillong ha ki bynta jong ka shnong Pomlum ha Upper Shillong kaba la jia naduh ka 13 tarik mynta u bnai.
Ki bynta ki ba shah ktah ha kane ka jingduh umkor ki long ka Shillong Municipal Board area, ka Shillong Cantonment Board area, ka Nongthymmai bad ka Mawlai. Na ka liang ka thad PHE ka dang trei shitom ban pynbha ia kaba la duh bad ruh la pyrshang ban pynphai ia ka um lyngba kiwei pat ki pipeline ba kham heh bad kane ka kam ka dang iaid shakhmat bad la khmih lynti ba ka kam kan dep haduh ka janmiet jong ka 16 tarik mynta u bnai.