U Bnai Risaw 2025 u dei u bnai ba ki paidbah ka Jylla ki shaiong namar ka jingjah briew ha ka Jylla ka la jan long man ka sngi bad kane ka la pynlong ia ki paidbah ba kin buh jingkylli bad pyrkhat ba lehse kine ki kam ki dei na ka jingdon bad ka jingleh jong ki ‘Menshohnoh’ hynrei hadien ba la wad bniah bad ioh jingtip kaba tikna na ki pulit, ka jingjah briew bad ka jingkynnoh ba dei ki ‘Menshohnoh’ ka dei tang ka khana shu thaw.
U Bah Vivek Syiem SP East Khasi Hills, u la pyntikna ba ki jingjia bad ki kam sniew kim dei kumba la kynnoh hynrei don kiba dei na ki kam samla bad don ruh kiba la shah pyniap da ka jingshahbatbor.
Wat hadien katei ka jingpyntikna ba la ai da u SP, hynnin ka sngi la ioh ia ka khubor ba la don ka Jingshah kynnoh ‘Menshohnoh’ ia uwei u Samla ia uba la tip kyrteng kum u Arnikstar Ryntathiang 35snem ka rta na ka Shnong Mawthlong Eastern West Khasi Hills District. Ha katei ka jingjia ki paidbah katei ka shnong ki la shoh la bom ia utei u samla hynrei na ka jinglah ban don ki Nongialam Shnong ia kaba la pyntip ruh sha ki Pulit, la tem ia katei ka jingkhihwin.
Hadien ba la wad bniah da ki Pulit, la lap ba utei u Samla u dei u ba duna ka bor pyrkhat bad la iathuh ruh ba u don ha ka jingshah sumar mynta ha MIMHANS Lawmali, Shillong.
