![](https://i0.wp.com/yutipnews.com/wp-content/uploads/2024/07/WhatsApp-Image-2024-07-11-at-7.12.04-PM.jpeg?resize=640%2C360)
Ka Dorbar Ki Waheh Kur Ri Jaiñtia mynta ka sngi Palei jong ka 11 tarik u Naitung, 2024 hapoh ka jingïalam u President ma K. L. Pariat bad u Assistant General Secretary ma G. H. Bareh kila leit ban aiti ïa ka dorkhas ha u Chief Executive Member (CEM) ka Jaiñtia Hills Autonomous District Council (JHADC) ma Thombor Shiwat ban kyntu jur ïa Council ba kan ithuh noh ïa ki Kur ki Jait kiba kheiñ pateng na ka Kmie kiba don hapoh ka Ri-Lum Jaiñtia.
Kane ka jingdawa ka long shi bynta ban pynbha pynmiat bad ban pynskhem ïa ki Kur ki Jait, da kaba pynithuh ïa ki lyngba ka Schedule Tribe kaba lah ban ïoh napoh ka District Council yn shuh na ka ophis DC ïa kaba la ai pathar ïa kino kino ki jait kur hapoh ka Ri-Lum Jaiñtia.
U ma K.L. Pariat ula ong lyngba ka jingithuh ïa ki Dorbar Kur bad ki Waheh Kur, kino kino kiba donkam ban apply ‘Scheduled Tribe’ yn sa leh noh na ka Council katkum bala ai bor na ka Sixth Scheduled.
La kyntu ïa ka Council lyngba ka Executive Committee ka JHADC ban kan shim khia ïa kane ka bynta bad ban pynmih noh ïa ka kyndon aiñ, khnang ba yn lah ban pynneh pynsah ïa ka jait ka kynja ha kine ki sngi ban wan.
Ha ka jingkren bad ki nongïalam ka “Dorbar Ki Waheh Kur” Ri Jaiñtia na ka liang u CEM ula pyntip ha ki ba ka Executive Committee kala dep ban ïakren sani bha ïa kane bad ka Committee kala pyrshang ruh ban wat ki lad ki lynti halor kumno ban shna ïa ka kyndon aiñ (Bill) kaba lah ban ithuh noh ïa ki Kur ki Jait hapoh ka Ri-Lum Jaiñtia.
Shuh shuh u ma Parait ula kyntu ïa ki Dorbar Kur ba kin wan shakhmat ban ai jingmut lem ïa ka Council halor kane ka bynta, namar kane ka long kaba donkam eh na ka bynta ka lawei jong ka Ri bad ka Jaitbynriew.
Ha ka juh ka por ula kren diaw halor ka jingïoh lad jong ki briew kiba nabar ban wan shong shnong shapoh ka Ri Jaiñtia kiba kynthup ïa ki briew na ri Myanmar kiba long ki Kuki bad ki Zo. Kumta u buh ka jingkyntu ïa u CEM ba kin peit bniah ïa kane da kaba ai hukum mardor ïa ki Waheh Shnong ban pynmih noh ïa kitei ki bar ri napoh ki shnong ki thaw.
U Assistant General Secretary ma G. H Bareh ula ong ka “Dorbar Ki Waheh Kur” Ri Jaiñtia ka khot kyrpad ïa baroh ki kur ban wan shakhmat ban ïatreilang bad ban pynbha shuh shuh ïa ka rukom ai jait ha ka kmie, namar kiba bun ki nongwei ki wan ban shim ïa ka jait Khasi Pnar tang ban ïoh ïa ki kam ki jam kiba lah ban ktah pat ïa ki trai jylla.
![](https://i0.wp.com/yutipnews.com/wp-content/uploads/2024/07/WhatsApp-Image-2024-07-11-at-7.12.03-PM.jpeg?resize=640%2C360)