Ka District Magistrate (DM) jong ka East Khasi Hills District, Shillong kala pyntip ba ka National Commission for Protection of Child Right (NCPCR) kala pynkhreh ban pyllait ia ka Joint Action Plan halor ka “Prevention of Drugs and Substance Abuse among Children and Illicit Trafficking” kaba dei ka lad ban iada na ka jingwan thied ki khynnah rit ia ki dawai kiba lah ban ktah ia ka koit ka khiah jong ki.
Kumta ka DM kala pynmih ia ka hukum ban bthah ia kito ki dukan die dawai (Pharmacy/Medical shops) kiba die ia ki dawai ba kynthup ia ki H, H1 bad X drugs ba kin hap ban buh noh da ki CCTV ha ki dukan jong ki ban ioh peit sani ia ka die ka thied jong ki.
Kumta ka kong R.M. Kurbah, IAS kaba dei ka District Magistrate ka East Khasi Hills kala pyntreikam noh da ka kyndon 133 CrPC ha kaba la bthah ia baroh ki Pharmacy/Medical shops kiba don hapoh ka District kiba die ia kitei ki jait dawai ba ki dei ban buh noh da ki CCTV hapoh ki dukan jong ki.
La ai por ia kitei ki dukan ban pyndep ia kane ka kam hapoh 2 (ar) taiew. Ia baroh ki jingringdur lyngba kine ki camera lah ban jurip da ki bor bala thung kyrpang da ka sorkar ha kano kano ka por.
Lada ki trai dukan kim pyndep ia kane ka kam hapoh ki por ba la buh kin sa shah pynshitom katkum ki kyndon jong ka aiñ, ia kane ka hukum la dep ban soi da ka DM naduh ka 17 tarik mynta u bnai.