Hadien ka jing shaphriang jong ka Signboard bala ioh kurup (Seized) ia u Dewiong u ba don ha kylleng ka East Jaiñtia Hills District hapoh ka MMDA Act 1957 u/s 21(4) ban ioh ia ka jingshai halor katei ka jingkurup ia u Dewiong ha kylleng ka EJHD na ka liang ka EJNC mynta ka sngi hapoh ka jingialam jong u President, Bah Sambormi Lyngdoh, ka Seng kala kynduh ia u Deputy Commissioner jong ka EJHD ban pan jingshai kaei kata ka MMDA Act, haba iakren bad ki nongialam jong ka Seng, u DC u la pynpaw ba ia utei u Dewiong lah kurup hapoh ka MMDR Act 1957, ymdei hapoh ka MMDA Act bad kadei ka jing bakla jong ki Nongthoh jong katei ka signboard.
Katei ka jingkurup ia u Dewiong ha kylleng ka EJHD kala mih hadien ka jing wan jurip jong u Chief Justice of Meghalaya (CJM) ia ka jingtih Dewiong be-aiñ hapoh ka EJHD bad dei ka Meghalaya High Court ka bala btah ia ka Sorkar Jylla ban kurup noh ia utei u Dewiong bala suba tih be-aiñ bad kane ka jingkurup ia u Dewiong bala suba tih be-aiñ kadei ha baroh kawei ka jylla ym dei tang hapoh EJHD.
Shuh shuh na ka liang ka EJNC kala kyntu ia u DC ka EJHD ban thung noh daka Independent Enquiry ha kaba iadei bad ka jingshallan be-aiñ ia u dewiong shapoh Malidor, Assam da ki bar-jylla ryngkat ka jingiatreilang bad ki katto katne ki briew kiba kam ialade kita ki High Level.
Ka jingdawa jong ka seng ban thung noh da ka Independent Enquiry ka long halor ka nongrim ba ka EJNC ka kwah ba kino kino ki aiñ (Act) haba pyntreikam ia ki dei ban long salonsar ia baroh bad kim dei ban ktah tang ia u rit u ria.