Ka East Jaintia Taxi’s Owner Driver Association (EJTODA), ha ka 2 tarik u Lber, ka la ai da ka shithi ha u Deputy Commissioner (DC) ka East Jaiñtia Hills District, na ka bynta ban kyrpad na u, ba dei ban weng noh mardor ïa ki maw bad ki jaboh kiba la tap ïa ka surok hajan ka Holy Family English School bad ha Lad Block Khliehriat, East Jaiñtia Hills District.
U President ka EJTODA, u ma Shining Siangshai, hadien ba la ïakynduh ïa u Deputy Commissioner, u la iathuh ba hadien ba la pyndep ïa ka jingpynbha ia u surok ha katei ka bynta, ki jaboh bad ki maw kiba sah la ieh sah ha ki bynta utei u surok la kumba shi bnai mynta.
Kumta ka seng ka la kyrpad ïa u kontraktor ban weng noh ïa kitei ki maw ki shyiap mardor, namar ki buh jingma ïa ki nongñiah kali bad ki nongleit nongwan, khamtam ïa kito kiba wan na shabar ka district ne jylla.
Ha ka jingiadei bad kane na ka liang u Deputy Commissioner, ula kular ba un bthah ïa u kontraktor ban pynkhuid noh ïa kitei ki jaboh ki maw bad kiwei kiba ieh sah ha katei ka jaka. Na ka liang u President ula pynpaw ba lada ym weng noh kloi ïa kine, ka seng kan shim da kiwei pat ki sienjam.
