Ka FKJGP-SEBA Circle mynta ka sngi hapoh ka jingialam jong u Mathew Pajat President bad u Eladmi Suchen General Secretary kila leit ban ia kynduh ia u Assistant Executive Engineer, Khliehriat Distribution Sub-Division, MePDCL ma K. Iakai na ka bynta ban dawa na u ban phah kylliang noh ia kito ki Post light kiba don ha shi lynter u surok lyngba ka shnng Umlyngsha ter ter shaduh sha Lama, Borghat.
Katkum ki jinglap jong ka seng ba kitei ki post light kumba long mynta kila jan khyllem bad ki lah ban khyllem ne ur ha kano kano ka por. Nalor kata ki don ruh kiba la shah tap ha ki tnad dieng ne ki sañium bad kane ka lah ban wanrah ka jingmynsaw bad ka jingjia ba sngewsih ia nongshong shnong ka thaiñ.
Ha kane ka jingiakynduh bad utei u sahep na ka liang jong u ruh ula kular ban peit ia kane ka jingeh bad ban pynkloi noh ban phah kylliang ia kitei ki Post kiba la jan ur.
