Ka seng FKJGP-East Jaiñtia Hills ka sngew ban pynrem jur halor ka jingshah pyniap u (L) Nasar Kyndait ryngkat ki lai ngut ki bar jylla ha kine ki khyndiat sngi baladep da ka jingleh riewkhlaw da ki katto katne ki riew thrang snam ki bymlah ban ithuh, katkum ki tyllong khubor la iohi bad suba ba kitei ki saw ngut ki lah ban shah pyniap na kawei ka jaka hynrei la bret pat ia ka met iap kitei ki saw ngut ha jan ka iew Umpleng, East Jaiñtia Hills.
Kum ka seng kaba peit ia ka bha ka miat ka seng kam lah ban pdiang da lei lei ruh ban pyniap beiñ kum ki mrad ia ka mynsiew briew bad lada dei shisha ba ki jingkynnoh katkum ba iohi ha ki lad pathai khubor ba kitei ki saw ngut la suba ba ki lah ban dei ki nongdie drok lane ki nongdih drok, ha ka jingsngew hi ba lada dei kumba kynnoh ruh ym dei ban leh riewkhlaw kumtei, hynrei dei ban ai jingsneng da ka rukom kaba dei bad pyni haka rukom ba dei ban im bad khadduh lada shem ba ki tuh ki them ruh dei ban ai sha ki bor ka aiñ ym pat ban shim ia ka aiñ ha kti la jong.
La dei ruh ban thaw ki lad ki lynti ban kin wanphai biang sha ka imlang sahlang kaba bha, khadduh ka seng ka dawa ba kitei ki riew thrang snam kim dei ban lait na kti ka aiñ bad lada ki Pulit kim lah ban kem ia kitei ki nong pyniap briew kamut ka don kaei kaei sha lyndet pynkut ka kyrwoh na u President bad u General Secretary ka seng u bah D. Sumer bad u bah Emlang Sutnga.