Ka Hynñiewtrep National Youth Movement (HNYM) West Jaiñtia Hills District kala leit ban dawa na u Branch Manager, ka State Bank of India bad na u Branch Manager ka HDFC Bank, ba ki dei ban buh kawei kawei ka Kor ATM hapoh kine ki Hospital kiba kynthup ha Jowai Civil Hospital Ialong bad ha Woodland WK Hospital Sabahmuswang, khnang ban pynsuk ïaki paidbah katei ka thaiñ bad kiba thiah pang hapoh kine ki Hospital.
Halor katei ka jingdawa ban buh Kor ATM, u bah Pynhun Shulet u President ka HNYM-WJHD, ula ong baki paidbah ba thiah pang hapoh kine ki Hospital, ki don hapdeng ka jingeh kaba khraw ban sei pisa, haba don kino kino ki kam kyrkieh kala wan rah jingeh ruh ïaki paidbah, ban leit sei pisa shaduh sha Jowai.
Kumta na ka liang ka seng HNYM, kala dawa na u branch Manager ka SBI Jowai Branch bad na u Manager ka HDFC Bank ba ki dei ban ïakren sha ki bor ba halor na ka bynta ban buh noh kawei kawei ka kor ATM hapoh kitei ki Hospital, khnang ba kan pynsuk ïa ki paidbah ba thiah pang ha kitei ki Hospital. Naka liang ki Branch Manager jong ki ar tylli ki Bank ruh kila kular ïa ka seng ban shimkhia noh.
Ha ka juh ka por ka seng kala ïoh ban ïakren ïa u Waheh shnong ka Shnong Ialong bad na ka liang jong u ruh u angnud ban don noh da ka kor ATM, hapoh JCH Ialong, bad u la kitbok kit rwiang ruh ïaka seng ba kan ïai trei shuh shuh ïa ki kam ba bha. Pynkut ka kyrwoh na u Publicity Secretary ka seng HNYM-WJHD Samla Jame Bosswel Sten.