Ka Seng HNYM kala dawa na ka sorkar ban weng noh mardor ia baroh ki briew jong ka sorkar kiba don ha ki check gate ba pher ba pher kum ha ki thanad Raliang, thanad Saphai bad ha ki jaka check gate jong ka DMR ba don ha Saphai, bad haka juh ka por ruh ka Seng ka dawa na ka sorkar ban buh noh da ki Magistrate ban check ia ki kali ba kit dewiong bad kit palat pud kiba iaid lyngba u jingkieng Myllep ba don mar jan bad ka shnong Saphai kaba buh jingma haduh katta katta ia u paidbah jong ka dong ka thaiñ Laskeiñ hi baroh kawei.
Namar ba ka Seng kam shaniah shuh ia ki briew jong ka sorkar kiba don ha ki check gate bapher bapher ioh lehse ba ki ia don bynta lang bad ki katto katne ngut ki briew ba leh benami ban pyniaid ia ki kali jong ki bar jylla da ka ba pyndonkam ban shna beaiñ da ki challan clinker/cement ban pyni ha ki jaka check gate bad ka jing kit pat ka long da u dewiong.
Ka Seng kala dep ban ujor lypa shwa ba ki kali kin iaid, ha ka juh ka por ka Seng ka dawa ruh na ka Transport Department ban weng shisiendon ia ka weight bridge ba don ha Saphai, namar ba ka Seng ka lap ba kane ka weight bridge kam juh thew ia ki kali ba kit ia ki mar bapher bapher.
Kumta lada ka sorkar kam weng ia kine ki briew jong ka, ka pyni baka sorkar ka ia don bynta lang ban leh ia ki kam be-aiñ.