Ka Joint Acton Committee (JAC), kaba kynthup ia ka Jaintia Hills Truck Owners Association (JHTOA) bad ka East Jaintia Hills Truck Owner & Transporter Association (EJHTOTA), lyngba u kyrwoh ba la phah da u Chairman bad Secretary jong ka, u Biangshwa Shylla bad u Kyrshan Dkhar, ha ka jingialang ba kyrkieh jong ka, mynhynnin ka janmiet, ha Eastside Inn, East Jaintia Hills, hadien ba ka la bishar bad iakren sani bha ia ka rukom long rukom man halor ka jingbym ioh lad shuh jong ki trok kit cement bad clinker jong ka ban bteng ia ka kit ka bah mynta lah duna ar taiew, na ka daw jong ka jingiakhih (strike) jong ka MCTODA, ka la shim ia ka rai ban phah beit ia ki trok ban bteng ia ka kit ka bah naduh mynta ka sngi bad ruh ban dawa na ka Sorkar Meghalaya ba ka dei ban pynthikna ba ym dei ban don kano kano ka jingpynthut ia ki trok jong ka ha shilynter lynti jong u surok NH-6.
Ka JAC ka la ong ba, kam don bynta ei ei ruh em ha kane ka jingiakhih jong ka MCTODA, hynrei ka lyngngoh pat de, ba ki trok kit cement bad clinker jong ka ruh, ki la shah bat lang bad ki jong kiwei pat ki trok. Ka jingbym ioh shuh jong ki truck jong ka, mynta la shi taiew tam ei ei, ban bteng ia ka kamai kajih, tang na ka daw jong ka jingshah bat ha katei ka jingiakhih jong ka MCTODA, ha ki bynta jong u surok NH-6, kane, ka la wanrah ia ka jingduhnong kaba khraw haduh katta, ia ki trai trok bad ki draibar kiba don hapoh jong ka lama jong ka JAC. Nalor ka jingdon jong ki jingdawa ba bun jait ba man man la ka sngi ha iing ha sem, sa ka jinghap ban siew ia ka ram (Instalment) trok man la u bnai, bad ruh, sa ba ka por Khristmas bad Snem Thymmai ka la wan mynta, ha kaba kin don shibun ki jingdawa pisa ha iing hasem. Te, lada kane ka jingshah bat jong ki trok jong ka JAC, ha kane ka jingiakhih, kan dang iai bteng kumne beit, kane kan sa wanrah iaka jingduhnong bad ka jingkordit ia ki trai trok bad driver bapli jong ka JAC lem bad ia ka iing ka sem jong kitei baroh ar.
Kum ban shu pynkynmaw, ha shwa ba ka MCTODA, kan sdang ia ka jingiakhih jong ka, ka JAC, ka la leit kyrpad ia ki nongialam jong ka ban ym bat ia ki trok jong ka JAC, hynrei sngewsih ban ong ba ka MCTODA, ka khlem burom ia katei ka jingkyrpad jong ka JAC, te namar kata ka daw, ka JAC, ka la hap ban shim noh da kane ka rai kaba mynta. Kat kum ba long mynta, ki bun bha ki trok jong ka JAC kiba la shah bat ha kane ka jingiakhih jong ka MCTODA tad haduh mynta ruh ha ryngkat ka jingkit kaba khia. Te, lada jia ba kitei ki mar ba don hapoh jong kitei ki trok ba la shah bat, kin sniew noh, lane shah tuh, lane shah leh kam sniew, mano ban bah khlieh ia kane? Ngi kwah ia ka sorkar ba kan pynshai ia kane.
U Chairman ka JAC, uba dei ruh u President jong ka JHTOA, u la ong, ba naduh ba la seng ia ka JHTOA ha u snem, 1982, ka seng kam ju thiah sngi, ka la trei shibun ki kam na ka bynta ka bha ka miat jong ki trai trok kiba don ha Ri Lum Jaiñtia, da dei tang ma ka marwei ne ha ryngkat bad kiwei pat ki seng, kynthup bad ki sengbhalang na Ri Khasi-Jaiñtia. Ha u snem 2020, ka la don ka jingdawa jong ka JAC, ha kito kipor, kaba kynthup iaka JHTOA, MTU, AJCCTA, AJHTA, bad kiwei kiwei de, ha ka ryngkat ka jingkyrshan lang jong kiwei kiwei pat ki sengbhalang jong ka Ri Khasi-Jaiñtia, ban pynkiew noh ia ka dor kit cement bad clinker ka ban ia-im lang, ha kaba ka sorkar jylla ruh, kat kum ka Notification, 13th January, 2020, ka la buh dor, Rs. 9/- per metric ton, shi kilometer. Hynrei, na ka jingmih kiwei pat ki daw, lyngba ka Notification kaba ha ka 25th Sept., 2020, ka sorkar jylla ka la kylla biang ia katei ka dor, da kaba buh minimum Rs.7/- bad maximum Rs. 11/- per metric ton, shi kilometer. Kumta, kat kumba ka long mynta, hooid, ki trok ki iaid ha ka dor ba la buh da ka sorkar jylla hi, tangba ka dei Rs. 7/- per metric ton shikilometer.
U Secretary ka JAC, u Kyrshan Dkhar, uba dei ruh u President jong ka EJHTOTA, ma u ruh, u la bynrap da kaba ong ba ka EJHTOTA ruh, naduh ba la seng ia ka ha u snem, 2023, ka khlem shong kli kti, hynrei ka la trei shibun ki kam na ka bynta ka bha ka miat jong ki trai trok bad ki nongshalan mar jong ka East Jaintia Hills District, da dei tang ma ka shi seng ne ha ryngkat kiwei pat ki seng. Ka EJHTOTA, ka la don shibun ki jingiakren bad jingiapynbeit kam bapher bapher da dei bad ka sorkar jylla, ne bad ka JHCMA, kiba dei na ka bynta ka bha ka miat jong ki trai trok bad nongshalan mar ka East Jaintia Hills.Ka JAC ka la ong ruh ba, ha ka jingiadei bad katei ka dor ba la buh da ka sorkar jylla, hooid, na ka liang jong ka JAC, mynta ruh, ka khlem shong kli kti, hynrei ka la dawa na ka sorkar jylla bad ka JHCMA ban pynkiew ia katei ka dor bad ia ka quota jong ki trok na Jaintia Hills, khnang ban ia-im lang. Halor kane, dang shen, ka JAC, ka la buddien ia katei ka mat jingdawa jong ka na ka sorkar jylla bad JHCMA, da kaba ha ka ha ka 12th August, 2025, ka la ai sa kawei ka dorkhast sha ka sorkar jylla bad sha ka JHMCA, bad ruh pynbud biang sa ka dorkhast halor kane, na ka EJHTOTA, ha ka 04th September, 2025. Halor kane ka phang, ka sorkar jylla ruh, ka la kular ba, shen kan sa lum ia ka jingialang
Ka JAC, ka la ong shuh shuh, ba hooid ka jingdawa bad ka jingiakren jong ngi bad ka sorkar ha ryngkat bad ka JHCMA, na ka bynta ban buh ia ka dor ka ban ia-im lang ka dang im bad ka dang iaid haduh mynta ruh, hynrei, ia mynta hi, ngim pat sngew donkam ban shim ia ka sienjam da kaba pynshongsngi ia ki trok, namar kam pat sngew donkam ia ngi ban leh kumta ia mynta ka kynti; bad ba, da ka jingpyrkhat jngai, ka JAC, ka sngewthuh ruh ia ka jingshah ktah kaba jur lada jia ba pynshongsngi ia ki trok wat tang shi sngi ruh. Kumta, katno tam ka jingshah ktah, lada ki trok ki hap ban shongsngi da ki taiew-taiew hynrei khlem mih soh ei ei pat na katei ka jingshongsngi. Dei namar kata ka daw, ia mynta, ka JAC ka khlem shong kli kti, hynrei ka dang iai bteng hi ban dawa na ka sorkar jylla bad ka JHCMA ia la ka jong ka hok, khlem da ktah ia ka kamai kajih jong ki trok bad ki draibar wat tang shi sngi ruh.
Kane ka jingbym ioh shuh jong ki trok jong ka JAC ban iaid ban ieng kum ba shait long ha ki por kiba la dep, ka la pynkthang ia ki dkhot jong ka JAC, da kaba bynrap ba ki trai trok ki siew ia ki khajna bad kiwei de ki jingsiew bapher bapher sha ka sorkar, hynrei kaba pynlyngngoh pat ia ki, ka long ba, balei pat ba ka sorkar kam lah ban pynthikna ia ka iaid ka ieng ba thikna, ba iaid beit bad ba shngaiñ ia ki trok jong ka lyngba u NH-6.
Ka JAC, ka la pynkut ia u kyrwoh da kaba ong, “Ngi, ngi thied trok na ka bynta ban kamai jakpoh – ym ban shu pynieng dur mot ha iing lane ha surok lane lynti-synkieng ban ioh peit kai ki briew. Na kata ka daw, ngi kwah ban pyntip sha ka sorkar jylla ba naduh mynta ka sngi, ki trok jong ka JAC, kin mih leit trei noh kum ba ju long man la ka por, bad, ngi dawa jur ruh, na ka sorkar jylla, ba ka dei pat ban pynthikna shai da kaba shim ia ki lad ki lynti kiba donkam kat kum ka bor jong ka ban pynthikhna, ba ka iaid ka ieng jong ki trok jong ka JAC lyngba u NH-6, ka dei ban long kaba iaid thikna, ba iaid beit bad kaba long shngaiñ, lym kumta ka JAC kan ym banse ban shim da kawei pat ka lynti kaba tyngeh”.
