Ka Joint Action Committee (JAC) kaba kynthup ia ki artylli ki seng, ka East Jaiñtia Hills Truck Owners & Transporters Association bad ka East Jaiñtia Hills Limestone Suppliers Association mynnin ka sngi, ha ryngkat ka dorkhast, ka la leit ia kynduh ia u Deputy Commissioner jong ka East Jaiñtia Hills District ban dawa na u ba dei ban shim khia kat kum ki kyndon aiñ halor ka jingkit palat pud ba beaiñ jong ki truck ba pher ba pher kiba dei iaid lynti lyngba u NH-6, kaba la pynlong ia utei u surok ban sniew noh ha shilynter lynti khamtam eh ha ki thaiñ Elaka Narpuh, ha kaba utei u surok u la jot rathai bad wanrah ia ka jingeh bad ka jingma kaba khraw haduh katta katta ia ki paidbah nongleit nongwan khamtam ia ki ba pang ba shitom.
Ka Joint Action Committee, ka la iakren sani bha ruh bad u Deputy Commissioner jong ka East Jaiñtia Hills District, ba katkum ba long mynta la shitaiew tam bad tad haduh mynta, ka jingsniew jong u NH-6, khamtam ha ki thaiñ Narpuh ka la long kaba i sangsot shisha haduh katta katta, kat haduh ba ka la don ka jingdheng kali kaba shyrkhei da ki phew phew kynta ha kitei ki thaiñ khamtam ha ki thaiñ naduh Ratachera haduh Tongseng. Ka daw baroh jong kane ka dei na ka jingioh kit palat pud bad lait lan jong ki truck ba dei iaid lynti lyngba une u surok bah. Ka jingkit palat pud jong ki truck ka la buh ruh ha ka jingma kaba khraw ia ka jingkieng Narpuh Sunapur bad ka Ripnar Samasi.
Kum ban shu pynkynmaw, na ka bynta ka bha ka miat jong u paidbah nongleit nongwan lyngba u NH-6, u ba dei u thied snam ba kongsan jong ka thaiñ Shatei-lammihngi jong ka Ri India, ka Joint Action Committee jong kitei ki ar seng, ha ka 22 tarik u bnai ba la dep, ka la pynlong ia ka jingkhynra naphang ia ki kali truck ba kit palat pud ha Kongong, Wapungshnong bad ruh ha Tongseng ha ryngkat ka jingiadonlang jong ki bor sorkar ba dei peit, ba kynthup naduh ki Magistrate, Pulit, ki sahep sorkar bad kiwei kiwei de. Ha katei ka jingkhynra, ka JAC ka la bat bad pynphai noh ia shibun bah ki truck ba kit palat pud.
Ha kaba khatduh jong ka jingiakren bad u Deputy Commisioner jong ka East Jaiñtia Hills District, na ka bynta ka bha ka miat jong u paidbah baroh ba dei pyndonkam ia u NH-6, khamtam eh ia ki nongshnong shnong jong ka East Jaiñtia Hills District, ka Joint Action Committee, ka la dawa tyngeh na ka sorkar bad ki bor District ba dei ban pyntrei kam hok ia ka Motor Vehicle Act, 1988 bad ka Prevention of Damages to Public Properties Act, 1984, ha ryngkat ki jingbyrngem ba lada jia ba ka sorkar kam lah ban teh lakam ia kane ka jingkit palat pud jong ki truck, ka JAC kan sa shim pat da kawei ka rai kaba tyngeh.
Ia katei ka dorkhas jingdawa jong ka JAC, la ai kopi ruh sha u Superintendent of Police, East Jaiñtia Hills District, District Transport Officer, East Jaiñtia Hills District, bad u Executive Engineer, PWD (Rds) NEC Division, Khliehriat. Kane ka long kat kum u kyrwoh khubor ba la pyllait da u President ka Joint Action Committee, u Ma Loveyou Bareh bad u Secretary, u Ma Deolangki Dkhar.