Mynta ka Sngi ka 18 tarik March 2025 ka Jaiñtia National Council (JNC), Jalaphet Circle hapoh ka jingialam u General Secretary jong ka u ma Giken Langstang ka la leit ban iakynduh markhmat bad u EE ka MePDCL Khliehriat Division u bah Micheal Pohshna ryngkat ka jingthoh halor ka jingbym ker bym da ia ki transformer kiba don hapoh ka Shnong Jalaphet.
Ka seng ka la ioh ban pynpaw ruh ia ki kyrteng ki jaka ba kynthup ia ka Thna Mulait, Urshuni, Lad shur shur, Shur shur bad Lad Narwan, kiba kine ki transformer kiba da donkam shisha ban ioh jingker jingda khnang ban tehlakam iakano kano ka jingjia kaba sngewsih. Ka seng ka la ong ba kum ha ki jaka nongkyndong ka jingjia shah ring light ia ki nongshong shnong bad ia ki mrad ka juh don khah khah bad kane ka dei kawei na ki dawbah ba kine ki Transformer kim don jingker kumba la dei ban leh na ki bor jong ka tnat ba dei peit.
Haba iakynduh bad u EE u la pyntip ba kane ka kam ka hap hapoh ka jingtip u SDO, bad ka seng kala ioh ban iakynduh bad u SDO bad naka liang jong u, u la ong ba halor kane ka kam um don bor eiei ban leh bad u la bynrap ruh ba ia kane ka kam hap ban peit da ki bor kiba halor kaba mut na Headquarter jong ka jylla.
Ka seng ka dap da ka jingsngew lyngngoh ba kat u SDO um don bor eiei ban leh ha kaba iadei bad ki kam bording kiba hap hapoh ka jingpeit jingkhmih jong u bad ka seng ka la ioh jingtip ruh ha kane ka sngi ba dang bun ki jaka hapoh ka thaiñ kiba iakynduh ia kane ka juh ka jingeh bad haduh mynta ruh kim pat ioh ia ka jingangnud ka jong ki halor ban ioh jingker ia kine ki transformer kiba buh jingma haduh katta katta ia ki nongshong shnong khamtam ia ki khynnah ba leit ba wan na jan kine ki jaka.
Ka seng ka buh ruh ia ka jingmaham ia ka tnat bording khamtam ia ka Khliehriat Division ba lada kane ka tnat kam don bor ban tehlakam ia ka jingthrang ki Paidbah khamtam ha ka kam iap kam im jong u Paidbah la dei ban khang noh shisyndon namar ban shu shong rieh tngen ha kine ki jaka khlem da trei hok ia ka kam bala bynshet ha ka kam myntoi shuh ban plie ia kane ka tnad, ong ka JNC.
Shuh shuh ka seng kala bynrap ruh ba kan sa shim da kiwei pat ki sienjam lada kane ka bynta ban ker ia ki transformer kam shym long kaba seisoh hapoh kine ki khyndiat por ban wan, ong u kyrwoh na ka JNC.
