Mynta ka sngi ka Jaintia National Council (JNC) kala leit ban buh da ka jingthoh ha u Deputy Commissioner, jong ka East Jaintia Hills District na ka bynta ban dawa na u ban pynsangeh noh shwa ia ka jingthmu jong ki ar tylli ki karkhana pynmih dewbilat kata ka M/s Meghalaya Cement Ltd bad ka Green Valliey Industries Ltd ban pynlong ia ka Public Hearing jong ki ha ka 24 bad ka 25 tarik mynta u bnai.
Na ka liang jong ka JNC kala pynpaw ba wat la kine ki company kila ioh ia ka jingmynjur na ka State Environment Impact Assessment Authority ha kaba iadei bad ka Environment Clearance, hynrei ka seng ka lap ba kine ki Company kim shym la lah ban pynbiang ia ka jingdonkam jong ki trai shnong jong kato ka jaka ba ki don, khamtam ha ka liang ka thungkam thung jam bad ka jingpynioh ia ki kam pynroi ha ki shnong ki thaw.
Nalor kata ka don ruh ka jingleh shiliang bad jingkhñiot ia ki Contractor bad ki Supplier kiba dei ki trai jylla kumjuh ruh wat ia kito ki nongtrei bylla hapoh kitei ki company.
Ka seng ka lap ruh ba ka jingthmu jong ka M/s Meghalaya Cements Ltd ban pynheh shuh shuh ia ka karkhana jong ka bad ruh ka jingkhlong maw da ka M/s Green Valliey Industries Ltd ha shnong Brishyrnot, kaba don hajan jong ka Eco – Sensitive Zone bad ka Narpuh Wildlife Sanctuary, Sonapur, East Jaintia Hills kan ktah ia ki mrad ki mreng, ki sim ki doh bad ki khlaw ki btap.
Ha kajuh ka por ka seng ka pynpaw ba lada kine ki company kin ioh ban khlong maw ha kitei ki bynta khlempep kan ktah ia ka Wah Lukha bad kan sa pynduh pyndam ia ki doh-um doh-pnad, kumjuh ruh kan jia ka jingtwa khyndew kaba jur sha ki bynta jong ka Wah.
Kumta ka JNC ka dawa jur ba dei ban pynsangeh shwa ia kane ka jingthmu jong kitei ki ar Company tad haduh bym pat lah ban thaw ki lad ki lynti kiba lah ban pynbiang ia ki jingdonkam jong ki nongshong shnong katei ka thaiñ kumjuh ban wanrah ia ki lad jingiada kiba pura.