Ka Jaintia National Council (JNC) Central Executive Committee mynta ka sngi jong ka 19.09.2024, hapoh ka jingialam u General Secretary Wanshwa Suting ka la leit ban buh ia ka dorkhat jong ka sha u Member Secretary ka Meghalaya State Pollution Control Board (MSPCB), Shillong lyngba ka office u Deputy Commissioner East Jaintia Hills District naka bynta ban pynsangeh mardor iaka public hearing jong ka M/S MeghaTop Private Ltd. kaba office treikam jong ka ha shnong Wahiajer Elaka Narpuh, East Jaiñtia Hills. Ka seng ha kane ka dorkhat jong ka, ba la soi da u President ka seng u bah Sambormi Lyngdoh bad u General Secretary bah Wanshwa Suting, ka la pynpaw ia ka jingkyndit ban iohi ba ka Meghalaya State Pollution Control Board, Shillong ka la pynbna paidbah ha ka 17.09.24 ban pynlong iaka jingpynsngew paidbah (Public Hearing) jong ka M/S Meghatop Cement Private Limited ha ka jaka buh project jong ka ha Wahiajer Narpuh, East Jaintia Hills District ha ka 18 u Risaw (October) 2024 naduh ka por 11 mynstep.
Kum ban shu pynkynmaw ba ha ka 17.08.24 uwei na ki nongiasaid ain u (L) Kynjaimon Amse u la pynmih ia ka khubor ba u la lap kat kum ka RTI ba ka M/S Meghatop Cement Pvt. Limited kam pat ioh ia ka NOC na ka Dorbar jong ka Elaka Narpuh naka bynta ban seng ia ka Cement plant jong ka hapoh ka Elaka.
Hynrei kaba lyngngoh pat ba ha ka 3 tarik July 2023 ka JHADC ka la ai jingbit ia ka M/S Meghatop Cement Pvt. Limited ban shna ia ka 3 million ton bad ka 50 MW power plant khlem da iaid kat kum ka rukom, hynrei la shu kam ba la ioh ia ka NOC na ka Elaka Narpuh, kane ruh ka dei kat kum ka jing ong u (L) Kynjaimon Amse ha ka khubor ba u la pynmih ha ki lad pathai khubor. Shuh shuh haka khubor u la iathuh ba ka NOC ba u Dolloi ka Elaka Narpuh u la ai ha ka jingshisha kam dei ka NOC ban seng Cement Plant hynrei dei tang ka jingpyntikna daka ktien ba lada jia ba ka Dorbar Elaka Narpuh kan pdiang ban ai, u Doloi un sa ai iaka NOC.
Hynrei kaba kham phylla shuh shuh ba naka liang jong ka Elaka Narpuh pat dang myn ha kane ka 14.09.24 ka la pynbna na ka liang jong ka Elaka lyngba u General Secretary ka Elaka u S. Sumer ban khot ia ka Dorbar kyrpang jong ka Elaka ban long ha ka 23.09.24, bad kawei na ki mad jingiakren jong ka Dorbar kyrpang jong ka Elaka Narpuh ka long halor ka NOC Meghatop Cement Pvt. Limited, bad kane ka pyni ba ka Meghatop Cement Pvt. Limited kam pat ioh ia ka kata ka NOC na ka liang jong ka Dorbar Elaka Narpuh. Kaba sngewphylla ruh na ka liang jong ka JHADC pat ka la ai kloi kloi ia ka clearance ia ka M/S Meghatop ban shna noh iaka Cement Plant hapoh ka thaiñ Elaka Narpuh, khlem da burom shuh bad khlem da ap shuh bad khlem da kheiñ snep shuh ia ka rai jong ka Dorbar Elaka Narpuh, kaei ban jia lada ba ka Dorbar kyrpang jong ka Elaka Narpuh kan ym pdiang ban ai NOC? Kane ka jingleh donbor jong ka JHADC ka pyni kumba don kaei re kaei sha lyndet. Ki kamram hi jong ka JHADC ki dei ban iada ia ki khyndew, ki syiap ia ki jingdon jingem bad ia ka Ri bad ka jait bynriew jong ka Ri Lum Jaiñtia ym ban shuh ai lad pathar ia ki nongwei ban shuh wan kamai spah na ka mei mariang kaba U Blei u la kyrkhu ia ka jaidbynriew.
Ka seng na ka jinglum jingtip jong ka, ka shem ba ka M/S Meghatop Cement kam pat ioh lane don ia kita kiei kiei ki kot ki sla ba donkam na ka Dorbar jong ka Elaka Narpuh ban seng ia ka kharkhana pymmih dew bilat hapoh ka Elaka Narpuh, kumta ka seng ka pyrshah ia kane ka jingpynlong ia ka jingpynsngew paidbah jong ka M/S Meghalatop Cement Pvt. Limited bad ka seng ka kyntu bad dawa ruh naka Meghalaya State Pollution Control Board ban pynsangeh shi syndon ia kane ka jingpynsngew paidbah jong ka M/S Meghatop Cement Pvt. Limited ia ka ba la buh tarik ban pynlong ha ka 18 Risaw 2024 bad ban burom ruh iaka sur jong u paidbah namar katkum ka jingiohi jong ka seng ka jingkwah kiba bun ba lang hapoh ka thaiñ ka long ban pyrshah ia katei ka kam, pynkut u Wanshwa Suting General Secretary JNC-CEC.