Ka Jaiñtia Students’ Movement (JSM), Western Region kala phah da ka jingthoh sha u Myntri ka tnad pule puthi ka sorkar jylla u Rakkam A. Sangma lyngba ka ophis u Deputy Commissioner, halor ka nongrim ban dawa buh biang ïa ka Exam Centre CUET ha nongbah Jowai.
Halor kane ka JSM ka kwah ban buddien biang ïa kane ka kam naduh ka 18/01/2024 ban dawa na ka sorkar ban don ïa ka Exam Centre ha Jowai na ka bynta ka CUET (UG) bad kiwei de ki Central Examination.
Ka JSM kala dawa ïa kane ka Exam Centre ha Jowai ban ïakhun ïa ka Exam CUET (UG) ban ïoh leit pule Bachelor Degree ha ki College Sorkar bad kiba ïasoh bad ka NEHU, kan pynsuk ïa ki samla na ki thaiñ nongkyndong da kaba kim donkam shuh ban leit shaduh Shillong.
Shuh shuh ka seng ka ong ka jingdon ka Exam Center ha Jowai kan ïarap ïa ki samla pule ban ïoh ïakhun ïa ka exam NEET, CUET (UG) kumba long ha u snem 2024.
Ka seng ha ka jingïakren bad u Deputy Commissioner ka West Jaiñtia ula kular ban shim khia ïa kane ka jingdawa ban pynïoh biang ïa kane ka Centre Exam ha Jowai, khnang ba ki samla napoh Jaiñtia kin ïoh lad ban thoh Exam ha Jowai. Ïa kane ka shithi ka seng kala phah lang sha ka NTA bad sha u Director of School Education and Literacy, Meghalaya.
