Ka Jaiñtia Students’ Movement (JSM) Western Region, haka sngi 13/05/2025 hapoh ka jingïalam u President jong ka u samla Heihok Supuh bad katto katne ngut ki dkhot jong ka, ki la leit ai da ka dorkhat lyngba ka ophis treikam u Deputy Commissioner ka West Jaiñtia Hills District ban dawa ban buh ïa ka Centre thoh exam CUET (UG) ha Kiang Nangbah Government College Jowai.
Ka seng ka la leit ïa kynduh ruh ïa ka Principal jong kane ka college bad la ïathuh ba kane ka college ka don haduh 50 tylli ki computer bad ka seng ka la ong ba kane ka college ka la biang palat ban buh ïa kane ka centre kum kawei na ki jaka ban thoh ïa kane ka exam CUET.
Ka seng naduh u snem 2024 ka la dep buh da ka jingthoh ha u myntri ka tnad pule puthi u Rakkam A Sangma ban pynbiang ïa ki computer ha ki skul sorkar bad ruh ha kajuh ka por ka seng ka la kyrpad ïa ka sorkar ban pynbha ïa baroh ki skul kiba don Jaiñtia Hills.
Shuh shuh ka seng ka la kyrpad ïa ka sorkar ba kan buh noh ïa kane ka Centre ha Jaiñtia Hills khnang ba kan ai jingmyntoi ïa ki khun samla kiba thoh ïa kane ka exam CUET, namar kumba ka long mynta lada don kino kino ki exam ki khun samla ki hap leit beit shabar na ka jylla bad kane ka buh ïa ka jingeh kaba khraw ïa ki.
Khatduh ka seng ka kyrpad ïa ka sorkar kat bym pat ïoh ïa kane ka Centre ka bha ban pynsangeh ne pyllait shwa ïa ki khun samla ban thoh ïa kane ka exam CUET.