Hadien ka jingud jingnam jong kiba bun ki nongshong shnong jong ka shnong Lejri bad kiwei ki de ki nongshong shnong ba marjan halor ka jingbymtreikam jong u Tower network ka Airtel u ba dang dep ban pyntreikam shen ha kine ki kyndiat sngi ba la dep ha ka shnong Lejri. Kane ka la wanrah ia ka jingeh ia kiba bun ki nongshong shnong jong ka thaiñ border kiba khmih lynti ba ka company Airtel lyngba u ne u tower kan lah ban sakri hok ha ka ban pynioh network sha kine ki thaiñ.
Kaba lyngoh pat ka long ba une u tower network jong ka company Airtel um treikam kumba la khmih lynti, kumta na ka liang ka Seng KSU Lejri Unit hapoh ka jingpeit jong ka KSU Narpuh Circle ha ka 03/06/2024 ka la shim khia ban thoh sha ki bor ba dei peit ban pynbiang mar mar bad ban pyntrei hok ban pynioh ka internet ba paka sha ki nongshong shnong jong kitei ki thaiñ kumba ki la khmih lynti. Ka seng ka sngewkhia ruh khamtam ba ha kum kane ka por ha kaba ka bor jong ka mariang na ka por sha ka por ka wan ban lynshop ba lada ki paidbah kim don ka internet kaba biang kumno kin lah ban tip ia ki jingpyntip ba donkam na ka liang ka sorkar kaba ju ai jingpyntip bad kumjuh na ka liang ki paidbah kumno kin lah ban pyntip sha ki bor ba dei peit lada jia ei ei ha ka por ba wan lynshop ka bor jong ka mariang bad ha ka juh ka por ka seng ka kyrpad ia ka sorkar ba kan tuklar lem ia kane ka kam na ka bynta ka bha ka miat jong ki nongshong shnong jong kitei ki thaiñ border.
Ha ka shithi jong ka Seng ka la dawa ruh na ka company ba kan thung ia I wei I trai shnong kum I nongtrei khnang ba kan ym thut shuh ka rukom trei kam jong u tei u tower network nammar ba ban ap ia ki nongtrei ban wan naduh office jong ka company kam long kaba suk namar katei ka shnong ba don u tei u tower ka lah long sha kyndong, ki lynti syngkieng kim long kiba biang ban poi sha katei ka jaka, kumta ka seng ka dawa ba ka bha ia ka company ban thung nongtrei ban peit ia u tei u tower da u trai shnong na katei hi ka thaiñ ne shnong khnang ba ka rukom sam internet na u tei u tower kan long kaba iaid beit iaid ryntih ha katei ka thaiñ. Kumta na ka liang ka seng ka dawa ba ka company ka dei ban leh kloi ia katei ka kam ha poh kine ki kyndiat sngi lym kumta ka seng kan sa shim da kiwei pat ki rai ban leh da kaba tyngeh. Kane ka long katkum ka kyrwoh na u Pynshngain Lamin, President bad MatheusTariang General Secretary KSU Lejri Unit.