Ka seng Meghalaya People United Front (MPUF) East Jaintia Hills District mynta ka sngi kala dawa mar dor na ki bor ba dei peit ban weng kam noh shwa ia kito kiba la ioh kam da kaba shu thung sop sop ia ki ha ka ophis treikam jong ka District Horticulture Officer (DHO) Khliehriat, East Jaintia Hills District.
Ia kane ka jingthung kam sop sop hapoh katei ka ophis ka seng ka la ioh jingujor na kiba bun ba lang bad dei mynta ka sngi ba ka seng MPUF hapoh ka jingialam jong u President ka EJHD u ma K. Blah ryngkat ka jingdonlang u President sengkmie u ma D. Laloo kila ioh ban leit jurip dalade ban lap ia ka jingshisha.
Ha ka jingiakynduh jong ka seng bad ka DHO, ka la ong ba don kiba dangwan trei ar ngut hynrei kam pat ioh jingtip namar ba ka dang shu wan join dang khyndiat sngi ha kane ka ophis. Ha ka jingiadei bad kane na ka liang ki nongialam ka seng ki la kyntu ia kane ka ophisar ba ka dei ban weng shwa ia kine ki briew bad ka seng ka ai por shibnai ban leh ia kane, lym kumta ka seng kan sa iaid da kiwei pat ki lynti.
Na ka liang ka DHO ruh ka la ong ha ki nongialam jong ka seng ba kan sa bud dien bad kan sa leh ia kaba donkam halor kane.