Ka Meghalaya People United Front (MPUF) East Jaintia Hills District kala dawa jur ia ka sorkar ban shim khia kloi halor ka jingorpait jong ka jingkieng Umpasu kaba don ha shnong Sonapyrdi.
Kane ka jingkieng ka don ha u surok bah National Highway 6 bad kaba pyniasoh ia ki 4 tylli ki jylla kata ka Assam, Manipur, Mizoram bad ka jylla Tripura. Kane ka jingtor jong kane ka jingkieng ka lah ban wanrah ia ka jingdkoh jong ka leit ka wan bad ka ban wan rah ka jingduhnong kaba khraw ia ki nongleit nongwan bad ia ka khaïi pateng.
Na ka liang ka seng ka kyrpad ia ka sorkar ba ka dei ban weng noh mardor ia ki shipai BSF kiba don hajan jong katei ka jingkieng namar ba ki shait bat sah ia ki kali bad pynieng ia ki haduh 4 lane 5 tylli ki trok heh halor jong katei ka jingkieng kaba la tor. Katkum ka jinglap jong ka seng bad wat tang haba iaid tang kawei ka kali heh ruh kane ka jingkieng kala khynñiuh jur, sa katno tam ban pynieng sah ia ki 4-5 tylli ki trok halor jong ka, pynkut ka khubor ba la phah da u President ka seng u ma Kyrshan Blah.
