Ka seng Pnar Student Movement (PSM) Central Body ha ka jinglamkhmat u President Central Body u E. Passah kala leit ban ia kynduh ia u Manager incharge jong ki ar tylli ki Company Mobile kita ka Jio bad Airtel ha ka jingiadei bad ka jingtih ia ki nala ban pynjam shiliang ia ki wire jong ki ha u surok bah Pasyih Garampani bad ha ki surok shnong.
Ia kane ka jingtih kila sdang naduh ki bynta jong ka shnong Khonshnong haduh ban da poi sha ka shnong Saphai, West Jaintia Hills District kaba la wanrah ia ka jingjulor bad jingsniew jong ki surok.
Ka seng ka la ioh ruh ia ka jingud jingnam jong ki nongshong shnong ka thaiñ, kiba la pynpaw ba kitei ki ar tylli ki Company mobile kila tih ruh ia ki surok pohshnong ia kiba la shna da ki dew bilat. Kaba pynsngewsih ia ki nongshong shong shnong ka long ba mynta la 2 bnai kynthih naduh ba la dep ban tih ia kitei ki surok na ka liang kitei ki Company kim shym la wan pynbha shuh ne maramot ia kaei kaba ki la dep ban pynjot pynpra la ka dei ia ki surok ba la shna da ka rong (Bsiang) ne da ka dewbilat bad kane ka ktah shi katdei eh ia ka leit ka wan jong ki paidbah ka thaiñ.
Kumta na ka liang jong ka seng kala leit ban dawa mardor na kitei ki heh nongpyniaid jong ki ar tylli ki Company mobile ba ki dei ban pyndep noh ban pynbha ia kitei ki bynta kiba kila dep ban pynjot, khnang ba suk ka leit ka wan ki paidbah.
Kane ka long katkum ka khubor ba la phah da u Publicity Secretary ka seng u H. Sayoo.
