Ka Seng Kur Bareh East Jaiñtia Hills District hadien bala ïoh khubor ba kawei ka longkmie ba armet kala khlad noh ha Maternity & Child Health (MCH) Hospital Jowai kaba la jia hynnin ka sngi 4 tarik u Jylliew 2025, ka la dawa na ka Myntri ka koit ka khiah jong ka sorkar Jylla ban pynlong da ka jingtohkit halor kane ka jingjia.
Na ka liang ka Seng Kur kala hiar mynta ka sngi sha MCH Jowai ban ïa kynduh ïa kiba haïing bad ban leit aiti da ka jingthoh ha u Deputy Commissioner ka West Jaiñtia Hills District ban dawa na ka Myntri jong ka sorkar jylla ba dei peit ia ka koit ka khia, ban pynlong ka jingtohkit halor kane ka jingkhlad ka kong Pynche Bareh kaba dei na ka shnong Jalaphet Bri Sutnga (Club Pyrdung), East Jaiñtia Hills District.
Ka seng kala ong ba kane ka la jia ka dei tang na ka daw jong ka jingbym shimkhia jong ki nongtrei katei ka Hospital kata naduh ki Doctor bad ki Nurse, kaba la pynduh ïa ka jingim jong katei ka longkmie ba armet. Da kaba ïathuh shuh shuh ba la pynkit ïa katei ka longkmie ha katei ka Hospital hynnin ka sngi ha ka por 9 baje mynstep hynrei na ka jingpynslem jong ki Doctor bad ki Nurse ban peit bniah ïa ka jinglong jingman jong ka bad ha ka por 9 baje mynmiet kala khlad noh.
Kumta ka seng kur kala pynpaw ka jingsngew bitar halor kane ka jingjia ba sngewsih bad kila dawa na ki bor ba halor ban pynshitom tyngeh ïa kiba donkti ha ka kam namar ka jingbym shimkhia jong ki ïa ka kam ba la bynshet haki.
Da kaba ong kane ka jingkhlad katei ka longkmie kala buh ha ka jingma ïa ki paidbah kiba donkam ban wad jingsumar na katei ka hospital sorkar.
Ha ka juh ka por kila dawa ban pynïoh ïa ka hok na ka bynta ka longïing jong katei ka longkmie kaba la khlad noh bad kaba ieh noh shadien ïa ki 7 ngut ki khun.
Ka Seng Kur hadien ka jingïakynduh bad u Deputy Commissioner ka WJHD ula kular ban pynlong ïa ka jingtohkit halor kane ka jingjia.
Ha kane ka sngi na ka liang ki nongïalam kur la ïalam khmat da u President ma Finelyness Bareh, u General Secretary ma Jesper Bareh lem bad ki dkhot EC Committee jong ka Kur.
