Ka Synjuk Dorbar Shnong jong ka Pamrapaithlu PHC ba kynthup ïa ki 21 tylli ki Shnong ba hap ha ka Pamrapaithlu PHC mynta ka sngi ka 15tarik -08-2023 ki la ïoh lad ban pynsngew bad ai da ka jingthoh ha ka Dr. M Ampareen Lyngdoh, Minister Incharge Health and Family Welfare ka sorkar jylla ha ka jingwan peit jong ka ïa kane ka PHC ba dang don shibun ki jingduna ba dang donkam ban pynbiang khnang ba kan lah ban shakri khambha sha kiba pang ba shitom kiba duk ba kyrduh.
Ha ka jingthoh ba la aiti la pynsngew ïa shibun ki mat jingdawa kawei na kita ba kham hakhmat eh ka dei ban pynkiew kyrdan noh ïa kane ka PHC sha ka CHC namar ba ka jingbun briew kala poi sha ka 40,000 ngut ïa kaba kane ka PHC ka ju ïoh ïa 50 ngut ki Nongpang OPD bad ïa 20 ngut ki Longkmie ba wan kha khun ha man la ka shibnai ka ba la buh jingeh shikatdei na ka daw ba ym don ïa ki kamra ba biang ba kylluid.
Ka jingdon tang iwei i Doctor Medical & Health Officer ha kane ka PHC ka la buh jingeh shikatdei ban peit ban sumar ïa ki ba pang ba shitom, kumta la dawa ban pynïoh sa iwei i Medical & Health Officer khnang ban ai jingsakhri bad jingsumar ba khambha ïa ki paidbah jong ka thaiñ.
Kiwei de ki jingdawa ka dei halor ban pynioh Ambulance da ka bathymmai, ban don ïa ka kor X-ray Machine, Ultrasound Machine, ban pynbun ki Medical Staff (Kynthei bad Shynrang) bad ki Nurses ha kane ka PHC,
La dawa ruh ban pynbiang ïa ka building & infrastructure ka ba donkam bha ban don kawei ka waiting room, Emergency Room, Labour Room, Storage Room bad ki tiar equipment ka Delivery Kits (HIV/Non HIV) bad ka Assist Vacuum Delivery.
Na ka Liang ka Dr. Ampareen Lyngdoh ka la pynsngew ba ka kloi ban shimkhia ïa kine kiei kiei baroh ki jingdonkam jingduna ban pynbiang ha kane ka PHC ha ki sngi ban sa wan bad kan sa bishar bniah ha kaba ïadei ban pynkiew kyrdan sha ka CHC.
Lah ban kdew ba hapoh ka East Jaiñtia Hills District ka don tang sa kawei ka CHC kata ka Sutnga CHC hadien ba la pynkiew kyrdan ïa ka Khliehriat CHC sha ka Civil Hospital, te la i donkam shisha ban pynkiew kyrdan ïa Pamrapaithlu PHC sha ka CHC.
Ha kane ka jingwan ïuhkjat jong ka ha kane ka PHC la synranlang da MDC Musniang Rangad u ma Phasmoon Dkhar, EM JHADC, U District Health & Medical Officer, EJHD Dr. D Shylla, ADC EJHD bah G Warjri, ha ryngkat ka jingïadonlang ka Dr. R Suchiang M&HO, ki Staffs jong kane ka PHC, Ki Waheh Shnong bad ki Secretary Shnong jong ki Shnong ba hap ha kane ka PHC lem bad kiwei kiwei de.
