Ki nongtrei ASHA hapoh ka lama jong ka Meghalaya ASHA Workers Union, West Jaiñtia District mynta ka sngi kila leit ban ai da ka jingthoh haka ophis District Medical & Health officer WJHD ban pyllait noh ïa ka bainong kaba dang sah bad ki skim kiba dei hok ban ïoh hashwa ban poi jong ki aiom lehkmen.
Kum ki nongtrei ASHA wat ha ka jingïoh kaba rit kila buh ka jingkyntu ïa ka sorkar ba ka dei ban sngewthuh ïa kine ki jingeh jong ki khun ki kti jong ki naduh ka jingkoit jingkhiah lyngba ka bam ka dih bad ki jingdonkam ha ka pule ka puthi.
Halor kane kila pynsngew kum ka tnad ba dei peit ïa kane ka kam kim dei ban pynslem shuh ban siew ïa ka bai nong jong ki, kaba kila dep ban trei la palat ïa ka 5 bnai bad kumjuh ïa ki skim kiba dei ban ïoh kum ki (Incentive) kiba la sah kut la slem, hynrei hapdeng kine jingeh kim shem la kynrad dien ïa ka kamram ban pyndep.
Na ka liang ka seng ki nongtrei ASHA Jaiñtia Region, kila ai ka jingïaroh kumjuh ïa ki nongtrei ka National Health Mission jong ka sorkar jylla kiba la ai ka jingïarap ban pynbiang ïa ki jingdonkam na ka bynta ki nongtrei ASHA ban wanrah ïa ka koit khiah haka ri hi baroh kawei.
Kila pynsngew ruh ha ka shi snem ki don shibun ki jinglehkmen naduh ka Christmas, Behdieñkhlam, Durga Puja bad kiwei de, kumta ka sorkar ka dei ban siew hashwa kum kine ki por lehkmen khnang ban ïoh pyndap ïa ki jingdawa ha ka ïing ka sem kumba ïoh lem kiwei de ki nongtrei sorkar, pynkut ka kyrwoh na ka President kong F. Timung bad ka Secretary kong Smt R. Sten.