Ka seng JSU Jowai Circle hapoh ka jingialam u President u samla Aplang Lamare bad u General Secretary u samla Wansalan Patwet ki la dawa mardor ia ka sorkar bad na ka tnat PWD ba kala dei ka por ban phai khmat sha u surok Jowai Intermediat Road lane uba ju khot u surok by pass u ba rim u ba pyniasoh na jingkieng Myntdu (surok Shillong-Jowai) shaduh sha lad Kiang Nangbah College, Jowai.
Ka seng ka kwah ban ai jingmut sha ka sorkar ba kan pynbha noh ia u ne surok khnang ba kan pynsuk ia ki nong leit nong wan namar mynta ki por u surok bah hapoh sor Jowai bad Mih Myntdu u long u ba jynjar bha ban leit ban wan namar ka jingjur palat ka sahkut kali namar baroh ki skul ki iew ki hat ki lah plie lut hadien ba ka sorkar ka lah weng ia ka jingkhang dam ia ki skul bad ki iew ki hat bad ki kali ki lah khapngiah hapoh sor Jowai bad kane ka pynlong ia ki surok ba kan blok da ki kynta naduh u surok na Mih Myntdu sha duh sha Iaw Musiang bad sha ophis u DC.
Ka seng ka lah ong ba lyngba ka jingmaramot bad pynbha noh ia u ne u surok by pass barim ka lah ban wanrah iaka jingkylluit ka surok hapoh ka sor Jowai bad kan kham pynsuk ia kiba leit Shillong lyngba une u surok.
