Ka Khasi Student Union (KSU) West Jaintia Hills District Unit, kala pynrem jur ia ka sorkar MDA-02 halor ka jingieh lyngkrang ia ka surok Jowai Bye pass, kaba don hajan Mihmyntdu ban mih sha Thalaskein, kaba la sniew sha ba palat kaba la buh jingeh bad jingma ia ki paidbah nongleit nongwan lynba kane ka u surok bah. Na ka liang ka seng mynta ka sngi hapoh ka jingialam u General Secretary u samla Leningrad Tariang bad u Finance Secretary samla Phrangki Papang bad katto katne ki dkhot kila leit ban jurip ia une u surok ban iohi bad sakhi dala ki jong ki khmat.
Na ka liang kitei nongialam ka seng kila ong ba kane ka jingjot jong kane ka surok, kala buh jingeh bha ia kiba bun ki kali kiba dei ban iaid lyngba kane ka surok naduh ki kali rit haduh ki kali heh. Bun mynta ki kali kila hap ban iaid noh lyngba ka surok na sor Jowai bad kane ka la wanrah ka jingdheng kali kaba jur shuh shuh ha sor Jowai.
Ka seng ka la dawa mar dor ia ka NHAI ne ka PWD ban maramot mar mar ia kane ka surok katba lah, kat bym pat jia kano kano ka jingjia ba sngewsih, sa kawei ruh kane ka bye pass ka dei u budlum jong ka roi ka par, ka kamai kajih bad kaba pynsuk ia ki nongleit nongwan khamtam ha ka pang ka shitom. Ka seng ka la ong ruh ba lada ka sorkar kam shimkhia ia kane ka kam, ka seng kam banse ban shim da kiwei pat ki sien jam.
