Ka Seng Hynniewtrep Youth Development Council (HYDC) ka la wan ha Shillong Press Club ban pynpaw ia ka jingsngewsih halor ka jingjah ki nongwan jngohkai pyrthei ha Sohra.
Haba kren sha ki lad pathai khubor mynta ka sngi ka 30 tarik Jymmang u President ka Hynniewtrep Youth Development Council u Bah Wynraiwan Sohtun u la pynpaw ba ka Seng ka dap da ka jingsngewsih kaba khraw halor ka jingpynmih kawei na ki kotkhubor ka Times of India kaba la thoh shai kdar ba ka sohra ka dei ka jaka kaba jur bha ki kam sniew (Crime Prone Area).
Ka seng ka pynrem jur halor ka jingkren jong ka kot khubor Times of India, kane ka jingthoh ba pynbudnam ia ka sohra ka dei kaei kaei kaba sngewsih namar ki briew kiba im ha Sohra ki dei ki briew kiba tipbriew tipblei shisha bad ki nongsohra ki tip katno ka jingdonkam ia ki nongjngohkai ba kin wan sha tei ka jaka bad ki nongsohra ki dei kiba burom ia ki nongwanjngohkai namar ka kamai kajih ki im ja na ki nongwanjngohkai.
U la pyntip ruh haduh mynta kam pat don ruh kawei ka kam sniew ba ka jaitbynriew kan shun kan isih ia ki nongwanjngohkai pyrthei.
U la bynrap ka jingmih khubor ha ka Times of India ba ka sohra ka dei ka jaka ba mih bun ki kam sniew ka dei ka jingkren laplah bad kumta ka Times of India ka dei ban da wad ia ka jingshisha shwa ba kan thoh ia kano kano ka jingthoh pyrshah ia ka jylla khamtam ia ka thaiñ Sohra kaba bun bah ki nongwan jngohkai kiba wan shangkai sha Sohra ka jaka kaba itynnad bha.
Kumta ka seng HYDC ka dawa na ka Times of India ba ka dei ban pynmap bad khlem kino kino ki kyndon ia ka jingthoh ka jong ki halor ka jjngjah jong ki 2 ngut ki nongwan jngohkai ha Sohra.