Ka Seng Jaiñtia Students Movement Eastern Region(JSM-ER) mynta ka sngi ka la leit ia kynduh bad ai da ka jingthoh ha u Deputy Commissioner, East Jaiñtia Hills District halor ban dawa pyntrei biang ka Retaining Wall ba la julor bad khlem tei biang la palat shisnem ka ba don ha Surok NH-6 ha shwa ban poi ka Khliehriat Infiltration Check Gate ka ba la dep tei da ka GR Infraprojects LTD. Hynrei hadien ba la dep tei kane ka Retaining wall ka la julor na ka daw ka jingbymbiang ka rukom tei bad ka rukom plan. Kumba long mynta tang kawei ka kali ba lah ban iaid ha kane ka bynta jong ka surok bad ka lah ban wanrah ia ka jingsahkut ki kali, ka jing accident khah khah ki kali ha kane ka jaka kaba lah ban buh jingma ia ki Nongleit Nongwan.
Ka Seng ka la dawa ruh na u Deputy Commissioner ban tuklar ia ka NHAI East Jaiñtia Hills District ban pyntrei kam ia ki Street light ba don ha shilynter u surok NH-6 East Jaiñtia Hills District ka ba la neh khlem treikam satia hadien ba ka NHAI ka la dep buh bad ki ba lah ban khyllem bad buh jingma ha kano kano ka por naka jingsarang jong kine ki post street light.
Kumta ka seng ka la dawa ban pyntrei kam shisiendon khnang kan long ka jingshngaiñ ha ka leit ka wan bad ban lait na ka kam sniew ha ka imlang sahlang.
Na ka liang u Deputy Commissioner u la kular ban shimkhia halor kine ki mat jingdawa jong ka Seng.
Ia kane ka jingleit ia kynduh ia u DC la ialam da u samla Wellson R D Siangshai President Eastern Region ha ka jingsynranlang u Kisme Dkhar Asst. Secretary, Eiladmiki Dkhar Discipline Secretary, ma Skhembhalang Dkhar President Southern Region lem bad kiwei ki dkhot.