Ka “Sur ki Nong Jaiñtia” kaba kynthup lang ïa ki seng bhalang napoh ka Rilum Jaiñtia, kila ai ka jingkyrshan bapura ïa ka Sur Ka Bri U Hynñiew-Trep ban dawa jur na ka sorkar ban kan pynpaw pyrthei ïa kiba donkti pynïap ïa u (late) Bah Cherishterfield Thangkhiew ha ïing sah jong u ha ka 13 tarik u Nailar 2021.
Ïa kane ka jingïalang Paidbah (Public Meeting) la pynlong ha stand Ummulong Iawmusiang Jowai, naduh ka por 12 shiteng nohphai sngi ba la pynïaid da u President ka Jaiñtia Student Movement (JSM) u samla Linningstar Rymbai.
Ha kane ka jingïalang paidbah la mih ka sur ban pynrem jur ïa ka sorkar kala shim ïa ka jingim jong u (L) Bah Cherishterfield Thangkhiew, wat hadien ba ula wan ban pyndem kum u nongïalam ka HNLC ban wanphai noh shapoh ka ri la jong bad sha ka imlang ka sahlang.
Sa kawei ruh ka “Sur ki Nong Jaiñtia” kala pynrem ruh ïa ka jingwanrah ïa ka report shah pyniap u (L) Bah Cherishterfield Thangkhiew kaba la dep ban (modify) da ka sorkar, khlem da pynpaw ïa ki kyrteng kiba donkti ba pynïap ïa u, da kaba kynthoh jur ba jingleh ïa kane ka don eiei sha lyndet ha kaba ka sorkar kala dep ban pyndam bad tah sia ïa kiba donkti, da kawei ka sur kila dawa na ka sorkar ban pynpaw paidbah ïa ka kaiphot kumba ka long (original) kaba la dep aiti da u Retired Chief Justice T Vaiphei sha ka sorkar lada kane kam urlong ha kine ki sngi ban wan, ka sorkar ka dei ban shim ka jingkitkhlieh lada jia kano kano ha ka shongsuk shongshngaiñ.
Kiba ai jingkren ki kynthup ïa u Romingstar Lamare General Secretary ka HYC, u Hammar Lyngkhoi Vice Chairman ka Sur ka bri u Hynñiewtrep, u Sambormi Lyngdoh President ka EJNC, u O. Tariang na ka JYF, u Saniah Shuchen na ka HANM, u N. Passah na ka JSU, u ma Paila Kordor Lyngkot na ka AJCVA, u ma Nehimayah Tyngkan uwei na ki riew rangbah jong ka Ri-Lum Jaiñtia bad kiwei kiwei de.