U President ka United Democratic Party (UDP) Youth Wings, u ba long ruh u Myntri ka Sorkar jylla, u Bah Kyrmen Shylla, u la ong ba ka sorkar jylla ka la dei ban thung da ki kynhun tohkit halor ka jingshah kynnoh donkti u Myntri ka sorkar MDA-2 ha ki kam khaïi drok.
Lah ban kdew hangne ba na ka liang u President ka Meghalaya Pradesh Congress Committee (MPCC), u Bah Vincent H Pala u la kynnoh ba u Sniawbhalang Dhar u donkti ban bei pisa na ka bynta ban khaïi drug ha ka jylla.
Haba kren sha ki ladpathai khubor, u Bah Kyrmen Shylla u la ong ba uno uno u dkhot ne u briew ym lah ban shu kynnoh iano iano ruh khlem nongrim hynrei wat la katta ruh haba mih kane ka jingkynnoh pyrshah ia u wei na ki Myntri ka sorkar MDA-2 ka lah ban long ba ki don ia ki sakhi sabut ki ba biang ban pynshisha namar hangne kam dei ba ki kynnoh halor u dewiong ne ka kyiad hynrei halor u drok u ba ngim kwah ba un ioh suhthied ha ka jylla.
U Bah Shylla u la ong shuh shuh ba ym don jingtip mano ba dei bad mano ba lait hynrei ai ba ka aiñ kan leh ia ka ba donkam bad lada lap ba u don kti shisha, la dei ban weng noh syndon ym tang na ka sorkar hynrei wat na ka jylla ruh. Bad la kdew ruh ba uba shah kynnoh u la dei ruh ban pynshai halor kane.
U Bah Shylla u la pyntip ruh ba na ka liang ka Youth of Presbyterian Church Rymbai, shen kan pynlong ia ka awareness program ban ai jingshai halor ka jingsniew u drok da kaba kdew ruh ba kum kine ki awereness program dei ban pynlong ha man ki shnong khnang ban lah ban tehlakam ia u drok ha ka jylla.