Ka Khasi Students’ Union War Jaintia Circle bad Ka Khasi Students’ Union West Jaintia Hills District ha ryngkat ka H.N.Y.F Southern Riwar Circle ha ka jingpyllait jong ki mynta ka sngi la iathuh ba ha ka 3 tarik mynta u bnai ki la hiar sha ka Shnong Rongkum Amlympiang ban pynsangeh mardor ia ka jingpyntrei ia ka Border Fencing ha kitei ki jaka.
Kine ki ar seng marsien ioh jingtip ba ka Sorkar ka la sdang ban iaid shakhmat ia ka Border Fencing ka la leit ban pynsangeh shisyndon bad ban beh ia kine ki nongtrei jong ka Company na ka daw ba ka Seng ka dawa ba kat bym pat lah ban pynthikna ia u Pud u Sam uba thikna bad ban ker na Zero Point, ki ar Seng kin ym pdiang ia kane ka jingleh jong ka Sorkar ha shilynter u Pud u Sam jong ka India bad Bangladesh hapoh War Jaintia. Kila pynpaw ba lada yn ker ia kata ka 150 yard kat ktah lut ia ki jaka ki puta jong ki paradoh parasnam kiba im sha katei ka thaiñ, khamtam kiba im ha ka rep ka riang bad ki shnong ha khappud kin duh ia u pud shnong pud thaw jong ki.
Ki ar Seng ki pynrem jur ia ka Sorkar khamtam ia u Local M.L.A kane ka thaiñ kiba nud ban iaid shakhmat ban lilam ia ki jaka ki puta jong ki paradoh parasnam sha ka Ri Bangladesh, kum u Nongmihkhmat ha ka jingshisha u dei ban long u nongiada ia ka hok longbriew manbriew jong ki paradoh parasnam bad ban ieng Rangbah na ka bynta ka jingmyntoi jong ka thaiñ War Jaintia kumba u la kular ha u snem 2018 ba shi inch ka jaka ruh kan ym leit sha ka Ri Bangladesh, hynrei mynta pat da khongpong ki kular bad u la pynshong syier ia ki paidbah jong ka thaiñ kiba don sha khappud lyngba ka jingthmu bad ki jingailad jong u ia ka Sorkar ban iaid shakhmat ha ka ban ker Sainar shiah.
Na ka liang ki ar Seng ki dawa na ka Sorkar bad u Local M.L.A ba ki dei ban pyndam shwa shisyndon ia kane ka order bad ban shim ia ki lad ki lynti kumno ban iada ia ki paradoh parasnam kiba don jaka sha ki thain khappud.