Ka KSU East Jaintia Hills District Unit lyngba ka Publicity Cell kala dawa na ka bor jong ka aiñ ban pynshitom da kaba sdien phasi ia kiba donkti ban pyniap iaki ar ngut ki nongniah kali kamai ha rilum Jaintia.
Kine ki ar ngut kiba shah pyniap ki dei u Damehipaia Papeng uba kamai kali Jowai sha Ladrymbai uba la jah naduh u bnai Nailar 10 tarik bad u Fullmoon Kharsahnoh ba kamai Jowai Shillong uba la lap ia ka metiap jong u ha ka juh ka sngi na Mynkre East Jaintia Hills.
Halor kane ka jingshah pyniap kine ki ar ngut ki nongniah kali, ki pulit kila kem iaki saw ngut kiba donkti kiba kynthup ia u I Love You Talang, Ramesh Dkhar, Tellme uba tip kum u Bor Pyrtuh bad u Sampher Ksoo.
Ka KSU East Jaintia Hills District Unit kala pynrem jur halor kane ka jingjia kine ki runar thrangsnam ban shim iaka jingim kine ki arngut tang ban tuh ia ka kali jong ki.
Ka KSU kala kyrpad ia ki bor ba dei peit ban pynshitom ia kine ki riew thrangsnam nong pyniap briew da ka ba rai sdein phasi shi sybdon ia ki . Kane ka long katkum ka khubor ba la pyllait da u Hamewapynhun Ryngkhlem, Publicity Secretary KSU EJHDU.