Mynta ka sngi ka Office Commissioner for Persons with Disabilities ha ka jingiatreilang ba ka State Resource Centre on Disability Affairs, kila rakhe ia ka sngi jong kiba briew ba don jingduna ne jinglong kyrpang ia kaba la tip kum ka International Day for Person with Disabilities ha phyllaw jong ka State Central Library, Shillong. Ka la don ruh ka iew ‘EMPOWERFEST-2023’ ia kaba la wan ban ot ribon da u Myntri ka tnat Social Welfare u bah Paul Lyngdoh ha ka jingiadon ryngkat u Pravin Bakshi, Commissioner Secretary Social Welfare.
Haba ai jingkren kum u Kongsan ha kane ka prokram u bah Paul ula ban jur ia ka jingdonkam ban thaw ne wanrah ia ka imlang sahlang kaba ai ka juh ka jingiaryngkat kyrdan bad ka jingpynkupbor ia kito ki briew kiba don ha ka jinglong kyrpang jong ka met. U la ong ruh ba na ka liang jong ka sorkar ka trei shitom ban wanrah ki lad ki lynti na ka bynta ka jingmyntoi jong ki briew kiba don ka jingduna.
Ha kane ka jingrakhe na ka liang ka ophis Commissiner for Person with Disabilities, kala pynkup burom ia u Director ka Sanker Rehabilitation Centre u Dr. Sandi Syiem da ka Champion of Mental Health Advocacy Award bad ia I Carmo Naronha na ka Bethany Society da ka Leader of Equality Award.
Kiwei de kiba la shah pynkup burom ki kynthup ia ka kynhun ialehkai jong ka Meghalaya Blind Women’s Football da ka Inclusive Sportmanship Award, u Rupari Nongrum da ka Inspirational Artist Award, ka St. Edmunds College da ka Trailblaizer in Accessibility Award, ka Sengrang G Momin da ka Inclusive Media Representation Award bad ka Ibadalin da ka Literacy Award.
Ha kane ka prokram u bah Paul ula pyllait ruh ia ka MegAbility App na ka bynta ki briew kiba don jingduna.
