Katba ka lyer Elekshon ka dang syaid bad rhem bha na ka bynta ban jied ia ki nongmihkhmat sha KHADC bad JHADC, ka jingialang bad jingialap Elekshon ruh ka dang thnem bha ha shwa ban poi katei ka sngi kaba khraw ha kaba ki seng bapher bapher ki leit sha la ki constituency na ka bynta ban ai ia ki jingpynshai bad ki jingpynksan ha la ki jong ki Nongrim. Ha kane ka sngi ruh, ka seng Voice of the people’s party (VPP) ka la leit ban ai ia ka jingpynshai paidbah kaba dei ruh na ka bynta pan jingkyrshan na ka bynta u kyrtong na kane ka constituency, Bah Banpyrkhat Nongrang.
Haba ai jingkren ha katei ka jingialang, na ka liang u Dr. Rani uba dei ruh u Nongïalam kane ka seng bad ruh u Nonghikai college, u la ther tyngeh ia ki seng saiñ pyrthei bapher bapher khamtam ia ki ‘riew shimet kiba la mih dur shipor ban ïakhun bad iakhih na ka bynta ka Reservation Policy lane ka bhah thungkam ha ka jylla hynrei kiba khlem lah ban iaineh bad ïakhun haduh ban da seisoh. “Dei tang ka VPP kaba la ïakhih shisha naduh ka dohnud na ka bynta ka Reservation Policy ha kaba u President Rangbah (Ardent Miller Basawiamoit) u la aiti ia la ka jingim 221 kynta ban shong shah thngan” ong u Dr. Rani.
“Dei tang ka VPP kaba la lah ban pynbor ia ka Sorkar ban review ia kane ka policy bad haduh mynta ym pat dep, bun ki kynnoh pat ia u Prah ba ki ïakhih ia kane ka policy bad ka la poi shaei?”.
U la pynshai ruh ba kane ka policy ka don mynta ha ka kti jong ka Sorkar bad expert committee. U la ban jur ruh ba ka Sorkar kadei ban wanrah noh ia ka kaiphot halor kane ka bynta. U la buh ruh u dak jingkylli baheh ia ka Sorkar Jylla, balei phi pynslem?. “Lada ka Sorkar Jylla kam lah ban pyndep ia ka reservation policy, aiti noh ha ka VPP, hiar shuki noh, ai noh ha ngi” ther u Dr. Rani ia ka Sorkar hapoh ka jingialam jong u Myntri Rangbah Conrad K. Sangma.