Ka jingbym shimkhia jong ki bor District ban teh lakam ïa ka jingbteng ka rukom theh khyndew kaba la jur palat sha ki bynta ka Wah Myntdu kaba dei ruh ka nongbsa um bam ïa ka sor Jowai, na ka liang u ma Khroo L Pariat President Khooid Ya Ka Wah Myntdu (KYM) ha ka jingkren sha ki lad pathai khubor mynta ka sngi, ula pynpaw ka jingsngew diaw kaba khraw eh halor ka jingbym pyntreikam ki bor District ïaki kyndon aiñ pyrshah ïa ki nongleh beaiñ.
Shuh shuh ula pynsngew ba dang ha kane ka 17 tarik u Kyllalyngkot lyngba ka jingbthah jong u DC kila dep ban pynlong ïa ka (Joint Inspection) ïa ki bynta jong ka Wah Myntdu ha ka jingdonlang naduh u MCS Assistant Commissioner, ki ophisar na ka tnad PWD (Rds), Water Resources Division, ki nongïalam ka Jaiñtia Fishing Environment Protection Association, ki nongïalam ka Khooid Ya Ka Wah Myntdu lem bad ki paidbah nongshong shnong ka sor Jowai.
Hynrei haduh mynta ym shym la don kano kano ka hukum kaba mih ha kaba ïadei bad ka jingkhang ban theh kyndew pathar sha ki bynta ka Wah Myntdu khamtam na ka jingpyntrei ïa u surok By-Pass na Khliehtyrshi haduh Treïongriang ïa kaba la shakhi ba ka jingtheh khyndew kala poi sha ki bynta ka Wah nalor ka jingjur jong ka jingdap shyiap haduh ka jaka ba tan ïa ka umbam na Moopiah.
Ula ïathuh ruh wat na ka liang ka ophis PHE Electrical kala pyntip shai ba kam dei ka kamram jong ki ban pynkhuid ïa u shyiap ha ki bynta ka Wah bad kane ka lah ban ktah ïaka rukom tan um bam ha kine ki sngi ban wan.
La ong ruh ba kane ka jingpyntrei ïa u surok kim shem la ïaid katkum ki kyndon aiñ jong ka NGT kiba la mana tyngeh ba ym bit ban pynjulor ïa ki bynta ka Wah Myntdu lane bret khyndew pathar katba lap namar wat ïa ka wah Mynkrem kaba wan tuid ha ka jingsngur sha ka wah Myntdu kala shah ktah.
Ula ong kum ki nongtrei mon sngewbha na ka bynta ka jingbha jingmiat jong ka Wah Myntdu hynrei kala pynduh mynsiem bha ïa ki na ka daw ka jingbym shim khia ki bor sorkar ban pyntreikam ïa ki aiñ.
Ha ka juh ka por u ma Parait ula kyntu ïa u DC ba kin pyntreikam hok kumjuh ïa ka pisa ba san lak tyngka kaba kila dep thep sha ka Account ban pynbha pynmiat ïa ka Wah Myntdu.
Ha kaba ïadei bad ki In-Situ Nala kiba la shna kylleng ki bynta ba don ki liar ban tuid sha ka Wah Myntdu, ha kaba ula ai ka jingïaroh ïa u MLA ka Jowai ma Wailadmiki Shylla uba la ïalam ïa u Commissioner Secretary ka sorkar jylla ban jurip ïa kitei ki nala um kiba khanglad ïa ki jaboh ban tuid sha ka wah.
Ula pynsngew ba wat na ka liang utei u MLA ula dep ban leit jurip ïa ka jingtih maw beaiñ sha ki thaiñ Byrni kaba ktah ïa ka mariang, kumta u buh ka jingkyntu ba u MLA ba udei ban wan jurip lem ïa ka rukom pyntrei ïa u Surok Jowai By-Pass (Khliehtyrshi-Treïongriang) kaba la long beaiñ.
Shuh shuh ula kyntu ïa ki bor pynïaid jong ka Jaiñtia Hills Autonomous District Council (JHADC) bad kumjuh ïa u Dolloi ka Elaka Jowai uba la ai bor ban peit ïa kino kino ki nongleh beaiñ da kaba pyntip sha ka Council ban leh ïa kaba donkam.
Halor kane ka jingeh kiba ka Wah Myntdu ka lah ban shah ktah, u kyntu ïa ki nongshong shnong ban shim ka rai ba khadduh ban mih noh shakhmat bad ban pyrshah ïa kane ka jingleh beaiñ ïa ka Wah Myntdu bad ïa kiwei de ki Wah namar ka sorkar kala shim sting palat ïa kane ka kam ïada.
Na ka bynta u Shyiap uba don ha ki bynta ka Wah u ma K. Pariat ula kyntu ïa ki paidbah nongshong shnong ba kin leit khar ïa u katkum ki riti dustur bad ban pyndonkam ïa u ha ki jingtei ha ki ïing ki sem la jong.