Ka Voice of the People’s Party (VPP) mynta ka sngi 16 tarik u Ïaïong 2025 kala pynlong ïaka jingïalang paidbah ha Iawthymme Jowai, halor ka nongrim kaba ong “Ka Jingpynlaitluid ïa ki paidbah ka Rilum Jaiñtia na ki jingshah thombor ha ka por Election”.
Kiba bun na ki nongkren jong ka party kila pynsngew sha ki paidbah nongshong shnong bad ki nongwan ïew halor ka nongrim jong ka seng kaba ong “ban pynim pat, ban pynbha pat bad ban pynkylla dur”.
Na ka liang jong u President rangbah ka VPP u bah Ardent Miller Basaiawmoit haba ai jingkren ha kane ka sngi ula ong, ka Party ka don ïa ki ar tylli ki mat ban pynsngewthuh sha ki paidbah, kaba nyngkong ïa kaba ka seng kala jop ka long ban hikai ban nym shah thied ha ka bor jong ka pisa (money power) ïa kane la shakhi ha ka Election MLA bad MDC kaba dang shu dep.
Kaba ar mynta ka long ka jingleh don bor (muscle power) kaba la pyntieng bad byrngem ïa ki paidbah ha ka por Election, ïa kane ka VPP kan ïakhun ban pynlaidluid ïa ki paidbah khamtam hapoh ka Jaiñtia Hills.
“Ngi la don jingkyrmen ban ïoh synshar hapoh ka JHADC ha kane ka Election MDC bala dep, hynrei ngi la jop pat tang 8 tylli ki Constituency bad kane kala buh ha ka jinglyngngoh ïa kiba bun ba lang bad ka Party ka pdiang ïa kane ka khlem duh jingkyrmen” ong bah Ardent.
Lada ki paidbah ka Jaiñtia Hills kin ïoh lad ban thep Vote kumba long ha KHADC, ka Party kala tikna ban jop ïa ka Elcetion MDC bala dep ha JHADC, ula ai ka jingïaroh ba ka Party kala ïoh ban sei ïa kawei ka longkmie (MDC) ka kong Deiwipaya Tongper kaba long kum ka ‘Latympang’ jong ka juk ba mynta.
Ula ai ka jingïaroh ïa ki MDC ka Party hapoh ka jingïalam jong u nongïalam pyrshah, ba ka Dorbar jong ka JHADC kala ïoh ban ïatai shibun ki mat ba donkam.
Ha kaba ïadei bad ka jingkren jong u MP ka Rajya Sabha uba la kynnoh ba ka VPP ka sngewtynnad ban leh Gunda ne ki nongteh jaiñiong bad nongrah suloi, na ka liang u bah Ardent ula pynsngew kat ka rta jong utei u MP kam donkam shuh ban kren kum kitei ki kyntien, la pynshai ba ka Party kam pynksan ïa kaei kaba jia ha Narwan namar ka jingmih huri hura ka long tang na ka daw ka jingshah shet kylla bad ka party kam ju pynshlur ïa ki kam sniew.
Shuh shuh ula kynthoh ïa ka Policy pyntriem jong ka sorkar ba mynta kala sdang sa ka jingphah tranfer ïa ki nongtreikam sorkar kiba suba nongkyrshan ïaka VPP, wat ïa ka kam Muster roll kila leh ïa kane.
Na ka liang ka Party kala maham tyngeh ïa ki ophisar sorkar kiba don bynta lang ha kane ka kam (tranfer) da kaba ong ka Party kan nym map lada ka lap ïa ka jingshisha pyrshah ïa kitei ki ophisar kiba shakri ïa ki lei san snem namar ka jingkylla kan sa wan. Ula ong wat ka rukom pynïoh ïing ïa kiba duk ba kyrduh lyngba ka skim Pradhan Mantri Awas Yojana PMAY jong ka sorkar kmie kala don ka jingpyndonkam bakla.
U Bah Ardent ula ïathuh ïa ka VPP la thaw ha ka 19 Naiwieng, 2021 bad ka don tang uwei u MLA hadien lai snem tam 2025 ka party kala don 4 ngut ki MLA, uwei u MP bad 25 ngut ki MDC, “balei ngi tieng ban mih shakhmat” namar ha kawei ka sngi ka VPP kan sa kurup ban ïoh bat ïa u lakam synshar hapoh ka Ri baieit eh.
“Lada u Blei u ibit ba ka VPP kan kurup ïa ka bor synshar, ha u snem 2028 ngin sar lut baroh 7 tylli ki Constituency hapoh ka Jaiñtia Hills, kane ka long ka jingsdang ban ïakhun ïa ka kam thombor, khnang ba ki paidbah kin shngaiñ ka mynsiem hapoh ka Ri la jong.To ngin ïaineh ha ka nongrim kaba skhem jong ka Party long katba long jia katba jia, haduh ba ka VPP kan ïoh ban bat ïa u lakam ha ka synshar khaddar bad ban ai jingkyrmen ïa ki longdien man dien jong ka jaitbynriew”, la ong u bah Ardent.
Ka VPP kan sa leit ïakynduh ïa ki nongpynïaid ka Election Commission of India, khnang ban lait na ki jingjia shah thombor ha ki por Election. Ha ka juh ka por ki paidbah kin ïoh ban jied laidluid ïa ki nongmihkhmat.
Ha kane ka sngi ïa ka jingïalang la pynïaid da u ma Awhai Andrew Shullai (MDC), ha ka jingdonlang u Vice President VPP u Dr Kara H. Shen, u bah Brightstarwell Marbaniang (MLA), ki MDC ka VPP na KHADC bad JHADC nalor kiwei de.
