U Chief Executive Officer (CEO) ka Shillong Municipal Board ula ïathuh ba ka ophis kala ïoh jingtip ba ki don katto katne ki kynhun kiba shim kabu ha kyrteng jong ka Shillong Municipal Board ban khong pisa beaiñ na ki nongshong die rud surok da kaba kam ba ka dei ka bai Registration.
Ha kaba ïadei bad kane na ka liang jong u CEO ula ujor da ka ejahar ha u Superintendent of Police ka East Khasi Hills District, Shillong ha kaba la kyrpad ia u SP ban pynshitom ïa kito ki briew kiba donkti ha kane ka kam beaiñ.
Na ka liang jong u CEO ula pynshai ba na ka liang ka SMB kam don kum kata ka bai registration na ka bynta ki nongshong die madan. Ia kane ka SMB ka la ïoh jingtip ruh na ka Meghalaya & Greater Shillong Progressive Hawkers & Street Vendors Association (MGSPHSVA) ba ki don kum kita ki briew ki leh mynleh ba ki dei na ka tnat SMB.
U CEO u la pyntip ba ha ki por ba la dep ka don ka kynhun ka Town Vending Committee (TVC) kaba la ïoh jingbit na ka ophis SMB na ka bynta ban lum jingkheiñ ïa ka jingdon jong ki nongshong die madan katkum ka Meghalaya Street Vending (Protection of Livelihood and Regulation of Street Vending) Scheme, 2023, tangba kane ka TVC kam ju shim pisa ne bairung na ki nongdie madan.