Ka Jaiñtia Students’ Union (JSU), Jowai Circle kawei na ka seng treimon sngewbha kaba paw bha hapoh ka Ri-Lum Jaiñtia, kala kyntu ïaki bor sorkar lyngba ka tnad PWD ba kan pynshna thymmai noh ïa ka surok (Intermediate Road) kaba ïaid na Lad Nartiang (Kiang Nangbah) bad mih sha jingkieng Myntdu.
Shuh shuh ka seng kala pynsngew katba dang mih ki sngi ka jingkhapñiah jong ka sor Jowai kala nang jur namar ka jingbun ki kali mator bad kane kala buh jingeh ïa ka leit ka wan jong ki paidbah nongshong shnong khamtam ïa ki khynnah skul na ka daw ka jingshakut kali ba khah khah bad kaba neh da ki bun kynta.
Ha kine ki snem bala dep ka seng kala ïoh lad ban pynsngew ïa kane ka jingeh sha ki bor sorkar bad kala khmih lynti baka sorkar kan shim khia ïa kane ka jingdawa, hynrei la pyni pynban tang ïaka dak ban shna ïa ka surok, hashwa ban pynlong ïaka Dorbar thawaiñ jong ka jylla na ka bynta ban ïoh jubab hapoh ïing dorbar, la ong ka seng.
Ka seng katkum ka jingïoh jingtip na ka tnad PWD la dep ban sanction pisa ïa kane ka surok, hynrei haduh kine ki sngi ym pat pynshna thymmai ïa ka surok, nalor bala poi sa ka aiom slap mynta.
Ka seng ka ong “Lada ka sorkar kan pynshna thymmai ïa kane ka surok Bypass (Jowai Intermediate Road) kan da long ka jingkyrkhu ha ka ïaid ka ïeng ki paidbah bad ban lait na ka jingsahkut kali ba man ka sngi ha sor Jowai”.
Halor kane ka seng kala lap dala ki jong ki khmat ïa ka jingsniew shaba palat jong ka surok, kumta ka buh ka jingkyntu jur ïa ki bor ba dei peit bad khamtam ïa u MLA ka thaiñ ba kin shimkhia mardor ïa kane kam, la pynkut u President ka Jowai Circle u samla Borntifulson Rupon.
