I kong Iamon M. Syiem iba dei i Chairperson jong ka Meghalaya State Commission for Protection of Child Rights (MSCPCR) haba ai jingkren ha ka jingialang kaba la pynlong mynta ka sngi ha Confrerence Hall jong ka ophis DC East Khasi Hills ha nongbah Shillong ila ong ba ka long kaba donkam haduh katta katta ka jingiatreilang hapdeng ki briew sorkar bad ki riew paidbah ne ki nongshong shnong jong ka jylla khnang ba yn lah ban pynduh ia ka kam khaïi be-aiñ ia ki khyllung khynnah hapoh ka jylla bad ha ka ri hi kumjuh.
Ha ka juh ka por i kong Syiem ila ai jingkren ruh halor ka jingpynsngewthuh ia ka hok (Rights) kaba ki khyllung khynnah ki dei ban ioh.
Ia kane ka prokram ba shi sngi halor ka phang ‘Combating Child Trafficking’ kaba dei ruh shi bynta na ka World Day Against Human Trafficking la pynlong mynta ka sngi ha nongbah Shillong da ka National Commission for Protection of Child Rights ryngkat bad ka Meghalaya State Commission for Protection of Child Right bad ka District Administration jong ka East Khasi Hills.
Na ka liang ki bor pyniaid District la iadon lang da i kong R. Manners, MCS, ADC bad i kong D. Kharshiing, MCS, ADC.
La ioh ruh ka jingbatai lyngba ki dur (Presentation) halor ka phang ‘Combating Child Trafficking’ da i Smt. Shaista K. Shah iba dei i Senior Technical Expert, National Commission for Protection of Child Rights.
Kiba la wan iashim bynta ha kane ka prokram ki kynthup ia ki dkhot na ka Juvenile Justice Board, ka Child Welfare Committee, ki ophisar jong ka Special Juvenile Police Unit, ka tnad Police, ki ophisar na ka Border Security Force, ki ophisar bad ki nongtrei jong ka District Child Protection Unit, East Khasi Hills District, Shillong.